Su ses de custu ghennàrgiu amus annotadu totus in TV s’ocupatzione de su Cungressu istadunidensu. Una truma de gente chi pariat bessida pro Carrasegare passigende in sos logos chi ammanìgiant su poderiu prus mannu de su mundu. B’amus rìsidu belle totu ca, bidu gasi, amus pensadu chi siat istada una brulla de s’Istòria: sos meres de su mundu, chi ant infadadu Paisos pro neghe de s’instabilidade issoro, bìnchidos dae unu fiotu de pedditzones.
Ma, como chi si nde sunt iscoberende sos piessignos minudos, sa realidade fiat prus meda sèria de comente nos est pàrfida. In paris cun sos pedditzones bi fiant trumigheddas de gente cun fusiles de gherra, chi fiat a catza de parlamentares pro los prèndere e arrapiare. Chi bi sunt istados cumandos datos a tardu dae su Presidente Trump, ca sa politzia de Washington est a suta de isse. Galu como non resessemus a cumprèndere si est istadu unu golpe fatu male o una proa de poderiu de unu polìticu macu chi at timore de carchi protzessu. Su chi paret est chi non siat agabbadu cun cussu atacu.
Sos grupos prus violentos e mègius organizados ant giai fatu de sos mortos de s’atacu una casta de màrtures de sa libertade. Est girende in sas retzas sotziales galu abertas s’immàgine de sa femina ochida, Ashli Babbitt, comente immaginedda pro pesare una rebellia su binti de custu mese, in su mentres chi Biden at a acollire su poderiu de Presidente de sos USA. Àteras boghes sunt narende chi si timent àteros atacos, ma custa borta a sos tzentros amministrativos de cada Istadu.
Sos pranos sunt andende a dae in antis, ma sa politzia e àteras partes de su guvernu de sos USA si nche sunt dende ite fàghere. Sos arrestos sunt creschende e si nche est cumprendende ite est acontèssidu de a beru. Ma sa dimanda chi nos depimus fàghere est si sa truma de su ses de ghennàrgiu fiat petzi angiones de istellare pro ischidare carchi cosa de prus mannu a pustis, una faddina ebbia, o forsis gente de sacrificare pro chircare de cumprèndere chie diat àere sustènnidu su golpe Trump.
De cust’ùrtima ischimus chi in medas non l’ant sustènnidu e antzis polìticos ligados cun Trump l’ant disamparadu. Ma custu est su chi si bidet in craru e si est andada gasi, Trump est finidu. Su chi non bidimus sunt sos chi l’ant naradu chi emmo, ma chi non si sunt decrarados, sunt sos polìticos de onni oru de sos Istados Aunidos chi sunt cun isse, sunt finas partes de politzia e de esèrtzitu chi bident bene su chi est acontèssidu.
Su chi est capitende como in sos USA est una gherra imberta, amus a bìdere ite at a acontèssere custas dies. Una cosa est crara, su ses de ghennàrgiu de su 2021, su mitu de sos Istados Aunidos si nche est istudadu.
(redatzione)
Leave a comment