Su trìulu de sa sanidade sarda est peorende

Su trìulu de sa sanidade sarda est peorende

Su deghessete de custu mese b’est istada un’àtera manifestatzione pro sa sanidade sarda in Tonara, sa punna est de mantènnere s’atentu in subra de sas serradas chi sunt capitende in sos ispidales de cussa zona, mescamente su Santu Camillu de Sòrgono. Su problema però est chi custas serradas oramai ant incumintzadu a acontèssere finas in logos de cura in sas tzitades prus mannas. Sunt de oe sas noas chi ant dèvidu tancare su repartu de ortopedia in Aristanis, ca mancaiant anestesistas, e cussu de chirurgia de Nùgoro ca mancaiant sirugianos. Su problema s’annanghet a sa dificultade de agatare dutores de famìllia e pediatras pro los fàghere traballare in sas biddas.

Sos chi mancant sunt sos mèigos de cale si siat genia: laureados in meighina giai bi nde at, su chi non b’at sunt sas ispetzializatziones e pro custu gente meda depet essire pro agabbare sos istùdios. Àteru problema mannu est chi giòvanos medas chi benint a istudiare inoghe non sunt sardos e cando ant agabbadu torrant dae in ue sunt tzucados, cosa diferente a sos pagos sardos chi resessent a intrare ma chi càpitat a s’ispissu chi abarrent in s’universidade chi los at acollidos. Custu ca sos ispidales sardos sunt pagos atrativos e male contivigiados. S’apretu est mannu de a beru, ma giai no est una faina noa.

(redatzione)

Leave a comment

1 Comment

  1. Sa Regione non azuada sa sanitade publica ma cussa privada, s’inari este ispesu male et non abbaidana a sos malaidos sardos, a sa zente nostra chi depet traballare . Cantu inari andat a sos ispidales de su continente pro nos curare? Milones de euros. Abberides sos oggios. Semus males amministrados da zente chi faghede sos interesses insoros.

Send a Comment

S'indiritzu email tuo no at a èssere publicadu. Is campos pedidos sunt signados *