S’Istitutu Camillo Bellieni de Tàtari presentat su progetu “Su sardu, sa limba nostra”, una filera de initziativas culturales e de amparu de sa limba sarda chi, in custos meses chi benint, ant a interessare s’amministratzione comunale de Biddanoa Monteleone, comente ghia, e sas de Monteleone Roca Dòria e Sulumedu. In su progetu ant a tènnere una parte de importu sas atividades de s’Isportellu linguìsticu chi, cun sa ghia de s’operadora Maria Lenarda Correddu, ant a durare 520 oras. In prus b’ant a èssere duos cursos de formatzione linguìstica, unu base e unu intermèdiu, cadaunu de trinta oras. S’atividade de amparu linguìsticu at a pertocare finas tres laboratòrios in ue su sardu at a tènnere sa funtzione de limba veiculare, chi s’ant a ocupare de costumàntzias antigas, cun sa punna de las fàghere patrimòniu cumpartzidu e de las trasmìtere a sas levas venidoras. Su primu, chi pertocat s’arte galana de brodare sas bestes antigas, l’ant a fàghere in Biddanoa, e ant a incarrigare sa recamadora Pina Riu. Su de duos, in Sulumedu, est unu laboratòriu subra de su traballu de su pane artìsticu, e ant a cunfiare a sas manos espertas de Maria Talia Tidore e Mariella Pinna sa tarea de fàghere a manera chi custa traditzione non si perdat. Su de tres, in Monteleone Roca Doria, est unu laboratòriu subra de su traballu de su pane traditzionale pro sas festas, cun Franca Verdi e Domenica Sechi. In prus b’at atividades de animatzione cun s’agiudu de bibliotecas, ludotecas, museos, giassos archeològicos, assòtzios culturales e totu sas realidades sotziu-econòmicas de su territòriu.
(sa redatzione)
Leave a comment