Su Rally de Sardigna ammentende Nicola Imperio

Su Rally de Sardigna ammentende Nicola Imperio

Cando sa gente chi non nd’ischit pensat a sos isport motorìsticos li benit a conca fragos malos e trìulu, mùsica e nuscos pro chie amat custa genia de garas. Ma fintzas chie non nde cumprendet meda e at bìvidu sos rallys in Sardigna ischit chi custu isport no est isceti lestresa e ispetàculu, est un’istare in paris in mesu a sa Natura, mandighende e bufende cun amigos betzos e noos, connoschende logos disconnotos e persones de onni giassu de Sardigna e fintzas de terramanna. Custu giòbia inghitzat sa de degheoto editzione de su Rally Itàlia Sardigna, proa ufitziale de su mundiale rally, chi at a interessare comunas medas de su nord de s’ìsula e chi est istada ammanigiada dae sa Regione e dae s’Automobile club italianu. Pro chie est amantiosu de custu isport un’addòbiu chi non si podet brincare.

Cust’annu sa comunidade rellìstica isulana at una resone in prus pro sighire custu ispetàculu: su santandria de s’annu coladu su Covid si nch’at furadu Nicola Imperio, un’òmine de gabbale e de importu mannu pro custa atividade in Sardigna. Est isse chi at seberadu e disinnadu sas proas in custos annos, agatende sa prus apretziada, sa de Monte Lerno. Est isse chi at fraigadu s’iscola pro navigadores Alberto Ganau (su primu navigadore trapiantadu de coro) reconnota dae sa Federatzione, unu traste de importu pro s’ambiente rellìsticu isulanu, ca at dadu sa possibilidade a gente meda de si leare su patentinu sena tzucare a foras. Est isse chi batiat in Sardigna pro more de sa sotziedade sua, sa Logistic Rally Testing Sardinia, sas iscuadras de primore dae onni oru de su mundu pro proare sas veturas inoghe. Un’òmine chi at fatu bene meda a custu isport, a sa Sardigna e a gente meda. Fintzas cust’annu s’ùrtima proa e sa prus de importu, mutida Power stage, chi at a èssere serente a Rena Majore, l’aiat disinnada isse. Pro chie lu connoschiat un’àteru reconnoschimentu a s’atividade sua.

(redatzione)

Leave a comment

1 Comment

  1. Bravissimu Gabriele, cumplimentos.

Send a Comment

S'indiritzu email tuo no at a èssere publicadu. Is campos pedidos sunt signados *