Su 17 de abrile de su 1921 Lussu, Bellieni e àteros sordados torrados dae sa Gherra Manna ant fundadu su Partidu Sardu de Atzione. Una fortza polìtica chi aiat raighinas in s’esperièntzia de sas trintzeas e de sa Brigata Tàtari, s’ùnica formatzione cun una base ètnica de s’esèrtzitu italianu intreu. Sa cussèntzia de pòpulu e de unidade chi aiant batidu dae su fronte lis aiat postu in conca sa netzessidade de autonomia dae s’Istadu e fintzas carchi cosa de prus. Chentu chimbe annos a pustis cudda erèntzia paret in arriscu.
A pustis de sa presidèntzia de sa Regione, Christian Solinas non at prus riunidu su Cussìgiu natzionale de su partidu e no at mai numenadu sa diretzione nen sa Cummissione de garantzia. Sa denùntzia la faghent sete segretàrios e presidentes betzos de su partidu (belle totu cantos sos bios de sos ùrtimos annos): Silvano Cadoni, Giovanni Colli, Giovanni Columbu, Lorenzo Palermo, Efisio Pilleri, Giacomo Sanna e Efisio Trincas. Issos ant iscritu puru, in una litera aberta, chi su partidu non resesset prus a faeddare non cun sos sardos ebbia, ma nemmancu cun sos militantes suos.
Sa cuntierra s’est pesada finamentas pro su mudìmine de su PSd’Az in contu de sas chistiones mannas de sa sotziedade, s’economia e sa polìtica sarda de oe, comente s’ispeculatzione cun s’energia birde. Sos murrùngios non sunt noos, e giai in s’addòbiu in Ilartzi de su 18 de abrile fiant essidos a campu. Però pròpiu pro neghe de cussa riunione, Christian Solinas aiat fatu mòere s’avocadu suo pro amonestare sos militantes de no impreare prus sos sìmbulos de su partidu sena su permissu suo.
Sas tensiones sunt creschende e pro custa resone b’at a èssere un’addòbiu su 24 de maju in Orgòsolo cun militantes maicantos, ma puru cun sos dirigente colados, totu pro pedire a Solinas de torrare a abèrrere su PSd’Az a sa democratzia e proare a sarvare s’istòria seculare sua.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment