– de Salvatore Serra –
Polìtica linguìstica cheret nàrrere finas a fàghere giornales cun artìculos chi non siant in italianu ebbia, ma fintzas in sardu, pro afortire sa capatzidade de custa limba de operare cun unu registru artu.
Oe bos presento unu nùmeru de “Su populu sardu”, òrganu de su movimentu omònimu chi essiat in sos annos 70 de su 900.
S’editore fiat sa Coop. Radiu Supramonte de Nùgoro e su diretore responsàbile fiat Gustavo Buratti. A dolu mannu sos giornalistas, forsis pro un’ idea antigòria de traballu colletivu, non firmaiant sos artìculos issoro, e duncas no ischimus chie sunt sos autores.
In custu chi est su nùmeru de s’istiu de su 1979 b’at artìculos de polìtica e economia, retzensiones de libros, poesias, lìteras de sos letores
Inoghe bos presento unas cantas rias de s’artìculu de prima pàgina.
________
Cando fimus faghende sos comìtzios nostros in sa campagna eletorale de carchi mese faghet, amus naradu a sa zente bennida a nos ascurtare: “Azis a biere apustis de sas eletziones sos corfos chi nos an a arribare dae su colonialismu”. In sos fatos su guvernu colonialista italianu, chin sa cara de pedde chi s’acatat, no at isetadu meda a tentare de ponner in brenucu un’atera borta sos sardos. At tancadu s’industria de Biddexidru (SNIA), at aumentadu sos pretzios de sas naves e de sos aeroplanos po sa Sardigna, amustrandenos in custa manera cantu pacu contet a faeddare de autonomia.
Aube sunu andadas a finire totu sas impromintas fatas dae sa DC? Aube est andada s’opositzione prominta dae sos partidos de sa manca? In cale manera sos sindacados italianos sunu difendende sos interessos de sos traballadores sardos? …-
Leave a comment