Est dae una chida e prus chi in su Meilogu est proende a fitianu. Mangianu de sole e merie de abba, o a su revessu, ma sena pasu. Sos terrinos non renessent prus a assutare e in totue si bident tretos chi parent lagos e rios prenos. Bunnànnaru at bighinados allagados e chentinas prenas de ludu e dannos. Tiesi su matessi cun domos e istradas suta a s’abba e dannos in totue. Bonorva e Codronzanu at bistu sas istradas mudare in rios, cun su perìgulu de si tragiare vetura e, mescamente, persones. Pro fortuna non semus pranghende carchi mortu, ma petzi unu disacatu.
Fintzas oe b’at noas de àteras biddas corfadas dae su disàriu. In Ulumedu s’abba de unu riu at aundadu una fatoria didàtica, e in s’istrada chi andat dae Macumere a Bosa est divènnida unu riu e s’abba nd’at bogadu fintzas s’asfaltu. Cras sa Protetzione Tzivile at decraradu s’arriscu pro àteras pròidas, in totu s’ìsula ma cun possibilidades prus mannas in sa provìntzia de Casteddu. Mai comente ocannu sa Sardigna est isetende s’istiu.
Gabriele Tanda
Leave a comment