Sos organizadores de su Festival musicale Liet in limbas minoritàrias e ragionales sunt chirchende una sede in ue organizare s’editzione de su 2027. Ocannu non nche sunt resurtados a atzapare unu logu chi s’esseret candidadu pro retzire s’eventu.
Su festival, chi ddi narant Liet International, est sa versione internatzionale de su Liet, festival musicale organizadu in Frìsia, in s’ala neerlandesa de custa natzione istòrica, dae su 1991, e dedicadu a sa limba frisona. Sa paràula liet, in frisone, cheret nàrrere pròpiu cantzone.
A sa manifestatzione podent partetzipare cantzones in limbas minoritàrias, a pustis de una seletzione fata dae una giuria de espertos internatzionales.
Sa prima editzione dd’aiat organizada in su 2002. Nd’ant fatu batòrdighi editziones, sartiende carchi annu.
S’ùrtima, sa de su 2024, dd’ant fata in Còrsica, in Bastia e at bintu una cantzone in giudeoispagnolu.
Sas limbas chi fiant cantados sos cumponimentos binchidores rapresentant una seletzione de sas diferentes minorias linguìsticas e ètnicas de Europa: catalanu, làpone, corsicanu, faroesu, frisone, brètone, ladinu, còrnicu e giudeoispagnolu. Ma in sos annos ddo’at àpidu finas sa partetzipatzione de limbas extraeuropeas, che a su Sranan Tongo, su crèolu de su Suriname, de raighina europea a base inglesa e neerlandesa, e s’ebràicu samaritanu, limba litùrgica de sa minoria religiosa erede de sos antigos samaritanos de Terrasanta.
Sa Sardigna at partetzipadu siat cun su sardu siat cun su catalanu de S’Alighera.
Sa limba semper presente est su frisone, mentras su territòriu chi at partetzipadu cun duos idiomas diferentes est s’Iscòtzia, chi est istada rapresentada dae su gaèlicu iscotzesu e dae su scots.
Organizat sa fundatzione frisona Liet International. Su riferimentu pro cale si siat informatzione est s’indiritzu de posta eletrònica lietint@gmail.com.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment