Prus o mancu su deghe pro chentu de sos italianos giogat a su fantafùbalu e custu chi est coladu e su momentu de s’annu prus de importu: cando si còmporant sos giogadores a s’arbaranu.
Su fenòmenu, nàschidu in Itàlia a s’agabbu de sos annos Otanta, interessat a ses milliones de persones in Itàlia, pro su prus òmines, chi s’addòbiant in austu pro comporare tres portieris, oto defensores, oto tzentrucampistas e ses atacantes, cun dinari fartzu, ma chi est su matessi pro totu sos chi partètzipant. Fata s’iscuadra cada die de campionadu sos fanta allenadores depent dare sa formatzione e bìdere ite faghent sos giogadores seberados ca, comente in su campionadu beru, b’at partidas e goal. Sas prestatziones sunt avaloradas dae sos giornales, ma giai bidende sas partidas unu podet cumprèndere comente est andende.
Podet pàrrere unu mundu de pitzinnia, e difatis calicunu si nde birgòngiat, ma est unu mercadu de dòighi milliones de èuros chi sustenet totu su setore de su fùbalu. Sos giornales isportivos sunt sighidos ca sèberant sos votos e duncas dant sas bìnchida o sas pèrdida de sa die; sas televisiones ca si bident fintzas partidas de iscuadras piticas, chi mancari tenent carchi giogadore curiosu. E finamentas sos espertos de istrategia e tàtica, sos chi faeddant de sa calidade de sos giogadores e de sos allenadores in sas retzas sotziales ant sighidores maicantos. Prus su campionadu italianu est de calidade minore, prus sos campiones sunt pagos, prus su fantafùbalu faghet ispassiare, ca ruent totu cantas sas seguresas e sos balores.
In su Rennu Aunidu, narat sa BBC, ant inghitzadu a impitare su fantafùbalu pro sanare dae sa ludopatia. Difatis sighire su campionadu cun cussa punna, ma sena iscummìtere cada die, podet dare a sos malàidos sa matessi satisfatzione. Sa Fantasy premier league, su campionadu de fantafùbalu inglesu, est crèschida meda in custos annos fintzas pro custa resone.
Gabriele Tanda
Leave a comment