Su bintisès de abrile de su 1986 a s’una de note fiat iscopiadu su reatore 4 de sa tzentrale nucleare de Chernobyl. Sa responsabilidade de su disacatu pertocat prus a comente fiat fraigada sa tzentrale chi a sos tècnicos chi ant proadu a arressare totu cantu cun pagas informatziones de sos problemas chi aiant sas istruturas. Difatis, no ischiant chi tènnere belle che istudadu su reatore batiat instabilidade ca creschiat sa pressione a intro de su chiu pro neghe de su xeno chi si produiat. Proende a lu allùghere pro lu torrare a batire a s’echilìbriu ant fatu peus, ca sa pressione est ismanniada gasi meda chi est iscopiadu totu cantu.
Sa noa de su disacatu no est essida a campu pro dies intreas: sas istitutziones sovièticas ant denegadu cantu ant pòdidu. Cando sos àteros Paisos si sunt abbistos de su problema s’URSS at dadu pagas informatziones, ma a lenu a lenu at dèvidu atrogare s’intzidente. Sa veridade non fiat gasi fàtzile a ispartzinare, ca cheriat nàrrere de àere faddidu e chi s’Istadu chi depiat amparare su pòpulu aiat fartadu.
A die de oe cussu logu est torradu in sos giornales pro sa gherra e pro s’arriscu de sos disacatos nucleares. Forsis però fintzas pro sa batalla de s’informatzione in ue s’intendet istòrias pagu craras in totue e in ue sa veridade est costoida e no at a essire luego.
Marco Corrias
Leave a comment