Progres – Progetu Repùblica at acumpridu a su de ses cungressos suos. Duas dies in Aritzo e Brebì, in ue sos indipendentistas ant addobiadu sas àteras siglas e assòtzios de custu cuntestu e, a pustis, ant seberadu sa segreteria e sos argumentos pro torrare a fàghere crèschere su partidu.
Sos traballos sunt inghitzados cun sos chistionos de Luigi Todde, su presidente betzu, e de Adriano Sollai, su segretàriu cunfirmadu, chi ant sutalineadu sas dificultades de s’ùrtimu annu e mesu chi no ant permissu de traballare comente sos ativistas aiant bòlfidu. Posca ant faeddadu sos rapresentantes de Torra! e IRS, sas fortzas chi dae carchi meses sunt traballende in pare cun Progres cun su bloh Helis, e ant ammustradu sos isetos de custa sèmida noa de sos republicanos sardos. S’addòbiu est sighidu cun sos interventos de sos rapresentantes de Sardigna Natzione, Meris, Comunidade, ANS, Corona de Logu EFA e àteros, comente s’assòtziu Sardigna-Palestina, Sardegna Possibile e Liberu chi ant imbiadu unu messàgiu.
S’addòbiu est istadu de importu ca su chistionu cara a cara, cun gente chi paret semper serente, ma a su matessi tempus a tesu, podet abèrrere maneras noas de fàghere polìtica e podet fàghere agatare punnas pro traballare in paris e barigare sas partziduras.
Domìniga Progres at seberadu sa segreteria noa: at cunfirmadu a Adriano Sollai e a Simone Lisci, segretàriu su primu e responsàbile comunicatzione su segundu; at inditadu comente presidente Sarah Poddighe, comente responsàbile organizativu Nicola Meloni, comente responsàbile formatzione Lucio Porcu e comente tesoreri Giacomo Loi. Su traballu mannu est istadu su de iscrìere e arresonare de sa tesi cungressuale chi at postu comente punnas prus de importu s’ocupatzione militare, s’ispopulamentu, s’economia e su cummèrtziu, sas ispeculatziones energèticas noas, sos trasportos e s’amparu de sa limba e de sa cultura sarda.
(redatzione)
Leave a comment