Su Comitadu Trenitalia Nuorese, chi dae medas annos est batallende pro s’ammodernamentu de sa trata a iscartamentu minimadu Nùgoro-Macumere, e pro fàghere unu cullegamentu dae Nùgoro a Terranoa, cun su PNRR, at manifestadu in dae in antis de s’istatzione de sos trenos in Nùgoro. A oe, totu sas promissas fatas sunt abarradas petzi paràulas e Nùgoro est s’ùnicu cabu-de-logu de provìntzia a ue no arribant sas Ferrovias de s’Istadu.
Sena trasportos adeguados est difìtzile a si mòere in su territòriu pro sa gente de su logu, ma peri pro chie arribat dae fora. Sas ferrovias difatis sunt sas matessi chi at connotu Gràssia Deledda, Prèmiu Nobel pro sa literadura, nàschida 150 annos a oe. Su territòriu de Nùgoro est de sos ùrtimos in Itàlia pro infrastruturas e sas ferrovias de s’Otighentos sunt petzi unu de sos ritardos de isvilupu chi durat dae annos meda.
Mariantonietta Piga