Treghentos gigabite de datos e belle 270000 documentos sensìbiles bogados e lòmpidos a sos suterràneos de su darkweb. Est s’impatu numèricu de su data-breach chi at corfadu Retelit, unu de sos prus mannos operadores de telecomunicatziones e servìtzios cloud in Itàlia. S’intrusione est comintzada dae su computadore de un’amministradore de sistema, ismanniende·si a pustis intre sa rete aziendale. A abèrrere su còngiu de Pandora est s’inchiesta aprofundida e puntuale de su tzentru de giornalismu investigativu indipendente IrpiMedia.
B’at finamentas unu particulare chi s’annanghet a sos nùmeros allarmantes de sos datos furados: sos duos meses de silèntziu de s’azienda. Est cosa nòdida chi perunu sistema podet èssere cunsideradu seguru e inviolàbile a su 100%, ca medas sunt sas variàbiles in campu: istruturales, tècnicas e mescamente umanas; duncas su problema primàriu no est sa violatzione. Su puntu crutziale est sa connotatzione polìtica, ètica e tzivile de comente benit gestidu su post-intzidente. Si IrpiMedia no aiat publicadu s’inchiesta sua, cun probabilidade manna nemos aiat ischidu su chi b’at sutzessu. Non si podet atzetare chi sos fornidores de infrastruturas crìtcas si callent a sa muda cando patint un’intrusione: sa trasparèntzia no est un’optional e non si podet bogare a sos utentes sa cussèntzia netzessària pro si difèndere.
Sa platea de Retelit ampra est e, si pensamus chi intre sos clientes suos b’at aziendas de difesa e 193 amministratziones pùblicas, est pretzisu unu meledu in contu de su cuntrastu intre sos interessos de sas aziendas privadas e sos diritos de sos tzitadinos, s’aneddu dèbile de sa cadena chi sufrit campagnas de phishing, trampas finantziàrias e furas de identidade.
Su silèntziu est chistione de seguresa colletiva. Mescamente cando pertocat sos diritos sotziales e digitales.
Gianfranca Orunesu
(Foto de Rafael Minguet Delgado)
Leave a comment