Su 7 e 8 de làmpadas votant 27 comunas intro de sa Tzitade metropolitana de Casteddu, 27 in cussa de Tàtari, 13 in sa Provìntzia de Gaddura, 20 in cudda de Nùgoro, 38 in cussa de Aristanis, 7 in Ogiastra, 11 in su Campidanu de mesu e 6 in su Sulcis. Sos disafios prus mannos sunt Portu Turre, Cuartu Sant’Aleni, Sestu, Tèmpiu e Seddori. Sas ùrtimas duas ant pigadu bàlia mescamente a pustis de s’introduida de sas règulas eletorales noas, chi ant seberadu chi in sos cabu-logos de provìntzia, si una fortza non bàrigat su 50% de sas preferèntzias, si depet torrare a votare in unu ballotàgiu.
In s’elencu de sos logos nde mancat unu, Bidoniu in sa provìntzia de Aristanis, chi no est resèssidu a presentare nemmancu una lista. Sa chistione, però non pertocat unu sentidu contra a sas istitutziones, difatis, sa bidda est minoredda, petzi 111 abitantes, chi non sunt resèssidos a si pònnere de acordu e tando, at a èssere gestida dae unu commissàriu.
Sas eletziones prus importantes sunt cussas de Cuartu chi est su tzentru prus mannu de Sardigna a pustis de Casteddu e Tàtari. Tres sunt sos candidados chi cherent conchistare su munitzìpiu: Graziano Milia, su sìndigu coladu, sustènnidu dae su campu largu; Marco Porru, s’assessore a s’Ambiente de sa Giunta Solinas espressada de su tzentru-dereta; e Roberto Matta, chi est fora dae sas cumbatas traditzionale e si proponet cun una lista tzìvica. Custa est s’ùnica votatzione chi podet tènnere influèntzia in contu de polìtica regionale.
In Portu Turre sa situatzione est partzida de prus, cun bator candidados: su sìndigu betzu, Massimo Mulas, de su tzentru manca; Ivan Cermelli, de sa Lega, chi at s’arrimu de sos partidos de su tzentru dereta; Sara Dettori chi at costàgiu PSd’Az e àteros partidos locales e Loredana De Marco sustènnida dae Sardegna chiama Sardegna e àteros ativistas.
A s’imbesse, Sestu est su teatru de su disafiu clàssicu: Michele Cossa de sos Riformatori at a inghìriu su tzentru dereta; mentras su Campu largu at agatadu s’acordu cun su nùmene de Michela Mura.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment