A sos apellos de sas fortzas polìticas in campu rispondent cussos de imprendidores, sòtzios de categoria, tzitadinos, fortzas sotziales e econòmicas, chi pedint de isòrvere in presse custa crisi chi non si bidiat dae medas annos e est interessende cada setore.
Confartigianadu Impresas Sardigna at imbiadu a totu sas fortzas polìticas unu manifestu, cun 10 puntos, pro apretare unu impinnu cuncretu a pònnere in atu atziones pro su bene de s’economia. Intre sas propostas: unu fiscu prus simpre e lèbiu; informatizatzione de sas pràticas: oe petzi su 28% de sas amministratziones locales gestit pràticas inlìnia; minimada de su cùneu fiscale e contributivu a su traballu; afortiare formatzione tècnica e professionale e aprendistadu. Pro s’aumentu de su prètziu de s’energia, Confartigianadu Sardigna pedit deretu una minimada de su prètziu de eletritzidade e gas, aumentados de su 108% in s’ùrtimu annu. E in prus sustenibilidade ambientale, atzessu a su crèditu, atuatzione de su PNRR ponende·nche puru sas impresas minores.
Mariantonietta Piga