Est agabbadu su de sessantasete guvernos de sa Repùblica italiana in setanta ses annos, cosa chi ispantat sos foranos chi càstiant sas noas chi essint dae s’Itàlia, pro neghe de sa paga calidade de sos partidos italianos chi fùriant dinari e energia pro istare belle semper in campagna eletorale. Pro una parte manna de s’imprenta Draghi pariat su sarvadore faladu a su Parlamentu, pro àteros unu cummissàriu missu in ie dae su poderiu mundiale pro li intregare su Paisu. A s’agabbu non est istadu nen unu nen s’àteru, ma at fatu su chi si podet fàghere in Itàlia: at ammanigiadu su chi b’est e cambiadu pagu e nudda. Ca s’Itàlia no est un’Istadu chi at bìvidu rivolutzione peruna, ma chi non si resesset nemmancu a riformare de a beru.
Su Presidente Mattarella at isortu sas Cameras e inditadu sa data de sas eletziones chi at a èssere su 25 de cabudanni. Est sa prima borta chi amus a votare in atòngiu. Sa die est istada seberada sighende sas règulas costitutzionales: sa prima data ùtile a pustis de sessanta dies. B’intrat pagu sa pensione de sos parlamentares chi la leant dae su 24: pro non la lograre bisongiaiat de fàghere rùere su guvernu a s’agabbu de làmpadas o a s’inghitzu de trìulas, ca sos onorèvoles abarrant in càrriga fintzas a s’intrada de su Parlamentu nou, prus o mancu binti dies a pustis de sas eletziones. Però est craru chi sa crisi s’est pòdida incumintzare petzi ca sa pensione fiat giai otènnida.
Sa lege cun sa cale amus a votare est sa matessi de s’àtera borta. No agradat a nemos, ma nemos la mudat. De preferèntzia non bi nd’at, b’at una lista seberada dae sos partidos chi sighit su proportzionale e cun su livellu lìmite a su 3% pro sos partidos a sa sola, de su 10% pro sas coalitziones, e posca disafios intre candidados in sos cullègios uni-nominales. Ocannu però amus a votare prus paga gente, ca su nùmeru de sos parlamentares est menguadu a pustis de su referendum.
Sos partidos sunt giai faeddende de comente s’ant a presentare e cun chie fàghere custa cursa istadiale. Sa dereta paret chi, comente a semper, at a pònnere a banda sas cuntierras e at a lòmpere in paris a sas urnas. Sa manca no ischit chie carrigare in sa coalitzione sua si sos chimbe isteddos o Renzi e Calenda. Fintzas su Movimento cinque stelle no s’ischit galu si at a andare a sa sola o cun àteros. Su trìulu est mannu, serbit carchi chida pro cumprèndere mègius ite amus a bìdere, ma ponimus in contu chi, in paris cun sos turistas, ocannu ant a bènnere in Sardigna sos polìticos italianos.
(redatzione)
Leave a comment