Sos patimentos de unu giòvanu #6

Sos patimentos de unu giòvanu #6

“Sos patimentos de unu giòvanu” de Johann Wolfgang Goethe, òpera traduida in sardu dae Manuela Mereu e publicada dae Condaghes in su 2015 (colletzione Àndalas).

11 de trìulas
Segnora M. istat male meda e deo prego pro issa, ca nde so patende paris cun Lotte. La so addobiende pagu in domo de s’amiga mea e oe m’at contadu unu contu curioseddu a beru. Tziu M. est un’agantzone lègiu chi in totu sa vida sua nche l’at dadu matana a sa mugere lassende·nche·la bìvere in misèria ma issa at ischidu semper ite fàghere e comente s’arrangiare. Pagas dies a oe, cando su dotore nche l’at naradu chi sas isperas de vida fiant a curtzu, issa nch’at fatu mutire su maridu (bi fiat Lotte puru) e nche l’at naradu: «Ti depo nàrrere una cosa chi cando mi nche mòrgio non ti diat agradare. Finas a como apo fatu sa massaja bona e istraviadore però tue m’as a dèpere perdonare si deo t’apo collionadu pro trinta annos. Cando nos semus cojuados mi nch’as dadu unu tantu, cosa de pagu contu, pro totu sas ispesas de domo. Sende chi a pustis amus cumintzadu a istare mègius e s’atividade nostra est crèschida, non b’est istadu mèdiu de ti cumbìnchere a annànghere cuddu pagu dinareddu chi mi daias. Tue l’ischis chi pretendias de m’arrangiare, finas in tempos bonos, cun sete fiorinos a sa chida. Mi nche los apo pigados sena murrùngiu perunu ma s’àteru mi nche l’apo collidu dae s’incassu de totu sa chida. E chie lu diat pensare chi sa mere nche furaiat su dinari? Non nch’apo dissipadu mancu unu soddu e mi nche dia èssere andada in paghe finas si non ti l’aia contadu. Ma a chie at a bènnere a inoghe a contivigiare sa domo forsis non bi la diat fàghere e tue nche li dias puru nàrrere chi mugere tua nch’est renèssida semper». Apo chistionadu cun Lotte de cantu podet èssere tzurpu su giudìtziu de s’òmine chi mancu si sapit de sa trampa bidente chi sete fiorinos bastant pro ispesas chi diant bàlere a duas bortas. Ma deo puru nd’apo connotu gente chi si diant àere mantesu in domo s’ampulla de ògiu de su profeta chi non finit mai sena nde li pàrrere ispantu.

 

 

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *