At interessadu totu s’Itàlia, e sa Sardigna puru, s’operatzione mandada a dae in antis dae su Grupu Anticontrafatzione e Seguresa produtos de su Nucleu ispetziale benes e servìtzios de sa Guàrdia de Finàntzia de Roma.
Sos militares nch’ant secuestradu, in 40 provìntzias italianas, 5mìgia tonnelladas de pellet pro riscaldamentu frassu e cummertzializadu cun trassas; 47 machinàrios e impiantos industriales destinados a sa produtzione de su pellet illegale, prus de 1 milione e mesu de sachitos bòidos cun indicos e marcos frassos. Sunt 52 sos meres de aziendas, bendidores, produtores, importadores e grossistas denuntziados. In su de Tatari nch’ant secuestradu un’impiantu de produtzione e 6 tonnelladas de pellet.
S’operatzione est cumintzada gràtzias a una atividade de anàlisi de sos finantzieris, chi at bogadu a pìgiu fartas in su setore. Su pellet pro riscaldamentu, difatis, depet sighire règulas particulares, pro garantire sa calidade de sa filiera produtiva e sa cunformidade ambientale de su produtu.
Su pellet si faghet pressènde sa burrumballa de linna a temperaduras artas meda; non si podent impreare colla o àteros ligantes, e non bi nde depet àere nudda mancu in sa matèria prima impitada. Custu pro garantire sa cumpatibilidade ambientale de su pellet e su funtzionamentu regulare de sos sistemas de riscaldamentu.
In s’ìnteri de sos controllos, fatos cun sa collaboratzione de s’Assòtziu Italianu Energias agro-forestales, sos Finantzieris ant cassadu violatziones in matèria de certificatzione de sa calidade, e irregularidades in sos impiantos de produtzione.
S’interventu ispetivu – sutalìniat sa Guàrdia de Finàntzia – at s’obietivu de assegurare su rispetu de sas règulas de su setore, tutelare sos operadores onestos, sa seguresa de sos consumidores e s’ambiente.
Mariantonietta Piga