Sa missa de sa Fundatzione Sardinia, sa Die in Tundu e sas barchitas ant ‘sarvadu’ sa prima Die de sa Sardigna organizada dae sa Giunta Pigliaru. A pagas dies dae s’eventu s’assessoradu fiat in su disisperu prus nieddu, sena su dinare e sena unu programa a sa sèria. Sos apellos e sas chèscias de assòtzios e grupos interessados non mancaiant. Delìbera e dinare trigaiant a arribare e s’est cumpresu chi su discùidu fiat de unos cantos e sa malafide de sos àteros.
Ma s’assessoradu regionale, incasciadu su decretu de variatzione de bilantzu, at fatu sa mossa pretzisa. At incarrigadu de s’organizatzione cun afidamentu diretu de 40 mìgia èuros tràmite mercadu telemàticu a Terra de Punt de Tore Cubeddu. Su vulcànicu e eclèticu operadore culturale (ma finas espertu de limba sarda, regista, produtore, editore e autore de programas tv, autore de sa publitzidade eletorale de Michela Murgia) chi est resessidu a pònnere in cuntatu sos ufìtzios de s’assessoradu ‘sididos’ de initziativas cun su mundu natzionalitàriu e indipendentista amantiosu de Sa Die chi aiat abba meda de nch’imbolare. E gasi si sunt prenas sas tassas de sa festa. Cubeddu at sarvadu s’assessoradu (mancari chi issu, interpelladu, nèrgiat chi no est beru).
Nd’est essidu su programa chi totus ant bidu cun tzelebratziones e missas de sa Fondatzione Sardinia e sas atziones de pratza de Sa Die in tundu (unu sòtziu autònomu cun intro finas elementos de ProgReS e àteros indipendentistas) intrare in su cartellone regionale dende una manu de agiudu a un’organizatzione finas a pagas dies in antis sena prus isperu a si sarvare. Sas barchitas imbentadas dae Pierfranco Devias sunt abarradas in fora dae su programa regionale, ma ant contribuidu su matessi a prenare una Die de festegiamentos de punna natzionalitària. E gasi su naviu de tàulas e lentzolos improvisadu dae Sardigna Natzione in pratza Yenne. Una faina crìtica però contra a su ‘collaboratzionismu’ de unas cantas fortzas.
Difatis, Devias, a s’in capas finas pro si diferentziare dae chie at collaboradu a manera manifesta cun sa Regione, at atacadu in Facebook a manera tosta a s’assessora de sa cultura pro su sèberu de su tema de su màndigu. Una temàtica chi non b’intrat nudda cun s’argumentu de sa festa. Un’atacu forte e sena mediatziones.
Su preju polìticu intreu de s’operatzione?
De seguru in sa Regione calicunu de su mundu acadèmicu at traballadu pro lassare Sa Die sena dinare. Su boicotàgiu at custrintu Rossomori e Partito dei Sardi a gherrare meda pro buscare un’àtera borta su dinare. Su paradossu polìticu est istadu chi s’organizatzione est andada meda a favore de su mundu indipendentista a indùrriu de chie a sas ùrtimas eletziones at seberadu a Michela Murgia. Mundu chi est a trivas de pare cun sos soberanistas de guvernu chi sunt in dificultade pro una polìtica linguìstica e identitària chi a pustis de un’annu non decollat. Sa resessida de Sa Die lis at dadu alenu.
Ma de seguru su datu prus importante est chi Sa Die cun custu tràgiu meda natzionalista (no intamen su kitsch folklorìsticu o snob de unas cantas fainas) no est agradada a sos ambientes acadèmicos chi sustenent sa Giunta chi aiant chircadu a ogni manera de truncare su dinare pro Sa Die. Amus a bìdere sas reatziones sende chi ant incasciadu unu bellu corpu dae cussa identidade polìtica sarda chi issos etotu non podent bìdere ca sunt italianistas verdaderos.
A ogni manera su personàgiu nou emergente de custa Die est Tore Cubeddu junior seneghesu. Si càndidat a èssere su personàgiu ‘forte’ de sa polìtica culturale identitària de sa Giunta Pigliaru. Cun s’ativismu suo at oscuradu finas àteros personàgios de su guvernu nou de s’identidade comente Paolo Zedda, Boreddu Cubeddu senior o sa matessi Claudia Firino. In su mentres Terra de Punt at bintu finas s’apaltu pro s’isportellu linguìsticu de sa provìntzia de Casteddu e nd’at dadu nuntza in su situ suo.
Leave a comment