Sos indipendentistas cadalanos ant torra bìnchidu

Sos indipendentistas cadalanos ant torra bìnchidu

Su fine chida coladu s’est votadu pro annoare su Parlamentu de sa Regione autònoma de Catalugna. Sos polìticos de su logu aiant pedidu a su guvernu ispanniolu de iscostiare sas eletziones pro neghe de su Covid, ma Madrid no at chèrridu. Tando si nche est andadu a votare cun su perìgulu de ismanniare sos contàgios e pro custu sa partetzipatzione est istada meda de mancu: in su 2017 bi fiat andadu prus o mancu s’otanta pro chentu de sos abitantes, custa borta pagu de prus de su chimbantatrès.

Fintzas cun su Covid e a pustis de annos de cuntierras, cun polìticos galu impresonados, in Catalugna ant torradu a bìnchere sos indipendentistas e prus de prima puru. Difatis sos sègios a sos partidos de custa genia sunt crèschidos dae setanta a setantabator e, pro sa prima borta, finamentas sos votos indipendentista sunt sa majoria: ant barigadu su chimbantunu pro chentu. Est beru chi sos votos sunt menguados de meda, ma cun maicanta gente chi non est andada a votare est fintzas normale.

Su partidu cun prus votos però no est indipendentista. Su Partidu Sotzialista difatis pro una deghina de mìgia de preferos in prus est coladu subra a Esquerra Republicana, sa prima fortza catalanista. Una de sas resones pro custu resurtu gasi bonu, de tzertu, est istadu s’importu de su candidadu issoro: Salvador Illa, chi est su Ministru de sa Sanidade de su guvernu de Madrid. Àteras duas fortzas contra a s’indipendèntzia chi ant bidu sos votos minimare•si unu pagu sunt istada su Partidu Populare e Podem chi ant pèrdidu carchi votos ma a s’agabbu aguantende. Su chi at pèrdidu de a beru est istadu Ciudadanos chi teniat su bintighimbe pro chentu e como nde at mantesu petzi su chimbe e mesu, aiat trintasès sègios e como nde at ses. Ciudadanos est sa fortza moderada prus contra a s’indipendèntzia, sa chi aiat sustènnidu s’opressione de sa giustìtzia de sos polìticos indipendentistas. In logu suo sos eletores ant premiadu Vox, unu partidu serente a su natzionalismu ispanniolu prus tèteru, chi ispinghet pro serrare sas iscolas de cadalanu e pro pessighire sos indipendentistas: dae nudda est coladu a su sete e mesu pro chentu.

E como ite at a capitare? Pere Aragones, su chi forsis at a èssere su Presidente imbeniente, at naradu chi cheret inghitzare dae nou a faeddare cun su guvernu de Madrid pro lòmpere a isòrvere in paghe sa batalla pro s’autodeterminatzione. Isse cheret unu referendum reconnòschidu dae totus e s’amnistia pro sos impresonados polìticos. Sas fortzas chi cherent sighire custa genia de sèmida sunt gasi su sessanta pro chentu de sa Generalitat catalana (sos indipendentistas prus Podem). Calicunu narat chi est fintzas possìbile unu guvernu de manca cun Podem, Esquerra Republicana e Partidu Sotzialista ghiadu dae Salvador Illa, ma sa majoria non bi creet meda ca sos indipendentistas non cherent partzire su fronte issoro.

(redatzione)

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *