Dae annos medas sos sardos pedint a sas istitutziones de valorizare sas istàtuas de Mont’e Prama. Posca chi sunt istados agatados in su 1974 sos Gigantes sunt istados ismentigados dae s’Istadu e dae sos fundos pro sa cultura, petzi posca trint’annos sunt istados acontzados in su Tzentru de Restàuru de Tàtari e ammustrados a su mundu. Dae cussu momentu sos Gigantes sunt intrados in sa conca e in su coro de sos sardos, divenende unu sinnu de s’Istòria sarda e fintzas de cantu custa est istada posta a banda dae sas istitutziones. Pro custas resones sas noas chi benint dae sa Regione e dae su Ministèriu sunt de festare.
Sa cuntierra pro s’acontzada de sos Gigantes, acontèssida in freàrgiu, aiat postu unu problema de propiedade. Como sa Regione paret chi apat fatu sa Fundatzione, pedida prima de totus dae sa Comuna de Cabras. S’ente at a devènnere un’ischera de mere de sas istàtuas, chi at a tènnere sa sea in Cabras e at a èssere ghiada dae unu sardu propostu dae sos entes locales e cunfirmadu dae su Ministèriu.
Un’àtera noa de importu est chi est inghitzadu su protzessu de ispropiamentu de sos terrinos a costàgiu de su giassu archeològicu. Logos in ue est dàbile meda chi b’apat àteros monumentos e forsis fintzas àteras istàtuas. Difatis su geo-radar aiat agatadu, medas annos a como, rastros de istruturas a suta de sa terra. In atòngiu custos terrinos divenint de s’Istadu e gasi si ant a pòdere fàghere iscavos noos, e fintzas fraigare logos pro valorizare su giassu chi como est sena nudda.
Si totu andat comente si tocat est una bìnchida de sa Sardigna intrea, chi at a pòdere bìdere s’Istòria sua reconnota e rispetada, mescamente inoghe. E giai fiat s’ora!
Gabriele Tanda
Leave a comment