Sos ex dipendentes de Air Italy, chi in sas dies coladas ant retzidu sas lìteras de licentziamentu, sunt torra protestande.
Custu mangianu, unos cantos traballadores, acumpangiados dae sos sindacados de su trasportu aèreu, ant manifestadu in dae in antis de s’aeroportu Costa Smeralda de Terranoa, in cussu chi, pro 60 annos, est istadu sa base de armamentu principale de sa cumpangia aèrea erede in antis de Alisarda e a pustis de Meridiana.
Una manifestatzione pro sutalineare s’iscunnortu e s’arrennegu pro comente nch’est acabbada sa vertèntzia.
Sos ex-dipendentes ant postu fogu a sas divisas, apicadas a su cantzellu de sa palatzina ue bi fiat sa sede de sa cumpangia, chi oramai non servint prus bidende su destinu tocadu a Air Italy a pustis de su licentziamentu culletivu e s’acabbu, su 31 de nadale, de sa cassa integratzione.
A nudda sunt servidos deghinas de addòvios intre ministeros, s’apretu de su guvernu e de sas regiones Sardigna e Lombardia a Alisarda e Qatar Airways pro non tancare sa cumpangia.
Su resurtadu est su chi semus bidende oe: iscunnortu e arrennegu.
Mariantonietta Piga