Ocannu sa Sardigna est Regione òspite in su Salone del Libro de Torinu. S’AES, Associazione Editori Sardi, partètzipat a s’eventu libràriu, in programma dae su 18 a su 22 de maju.
Su stand de sa Sardigna est in su Padiglione Oval – T122- U121. Sas atividades culturales sunt coidadas cun sa collaboratzione de s’AES e de sa Fondazione Sardegna Film Commission.
Su tema de su Salone 2023, lòmpidu a sa de 35 editziones, est Attraverso lo Specchio, in riferimentu a sa Alisa in su Paisu de sas Meravìgias de Lewis Carroll.
Su sòtziu de sos editores, presèdidu dae sa tataresa Simonetta Castia, at aprontadu una sèrie de initziativas pro ognuna de sas dies de sa mustra. Signalamus sas prus importantes. Si cumintzat cun Sardegna Angedras – L’isola allo specchio, dedicadu a Gràssia Deledda, Sergio Atzeni, Giulio Angioni e Giorgio Todde, cun sas leturas de Vanessa Podda, Giovanni Carroni e Fabio Marceddu.
Semper su 18 tocat a L’essenziale è invisibile agli occhi, dedicadu a su Printzipeddu de Antoine de Saint-Exupéry. Partètzipant Diegu Corraine, chi comente editore de Papiros at publicadu tradutziones de s’òpera de s’autore frantzesu in diferentes limbas, a prus de totu cuddas faeddadas in Sardigna. Cun issu Mariano Mariani, diretore de s’azienda ispetziale de su parcu de Portu Conte.
Su 19 ispàtziu a sos prèmios a sas artes de su libru Lorem Ipsum, istituidu dae su festival Mediterranea. Culture. Scambi. Passaggi. Interventos de Simone Caltabellotta, Simonetta Castia, Isabella Ferretti, Marco Pautasso e Marco Vigevani.
Su 20 sa protagonista est Gràssia Deledda. Dino Manca presentat su libru suo Sento tutta la modernità della vita, pro AIPSA, in collaboratzione cun s’ISRE. In prus su crìticu literàriu Alessandro Marongiu mòderat 150 anni di Grazia, cun Duilio Caocci, Dino Manca, Angela Guiso e Piero Mura.
Su 21 Francesca Casula, Elia Cossu, Simonetta Castia, Emiliano Longobardi, Giacomo Mameli e Davide Peddis faeddant de sos Festival literàrios sardos.
(gianni muroni)
Leave a comment