Amus giai iscritu inoghe chi s’Itàlia est su Paisu in Europa in ue sos istipèndios sunt menguados illogu de crèschere in sos ùrtimos trint’annos. Como cun s’inflatzione su problema est ismanniadu e sos professionistas prus de importu si nde sunt andende dae inoghe.
A fitianu s’intendet in s’imprenta chi sas figuras prus de giudu, in fora de sas làcanas de s’Istadu italianu, sunt pagadas meda de prus de inoghe. Mastros, infermieris, ingennieris, tècnicos informàticos e gasi sighende, tramudende in fora podent fàghere una vida prus dèghida, pro su chi pertocat su dinari. Como sunt lompende sos primos datos e ispantant ca s’intritzant cun una crisi intesa meda in Sardigna: cussa de sa sanidade.
Intre sa fuida in sos àteros logos de Europa, b’at, petzi ocannu, 500 mèigos chi si nche sunt tzucados a Aràbia Saudita. Cunditziones de traballu prus còmodas, cun machinàrios de gabbale e cun istipèndios chi podent barigare su dòpiu chi unu professionista leat inoghe. Mescamente figuras de importu, comente sos dutores de prontu sucursu, inoghe leant pagu de a beru, cun arriscos e responsabilidades chi sunt creschende e cunditziones chi sunt peorende.
Su guvernu, però, non cheret chi sos istipèndios crescant, pro neghe de s’inflatzione chi però at fatu balangiare meda pagos ricos. Cunfirmende sa traditzione italiana de fàghere su dèbile cun sos fortes e su forte cun sos dèbiles, ma como chie podet fuit e chie bi perdet est sa comunidade.
(redatzione)
Leave a comment