Sos autotrasportadores de sa Sardigna ant a iscioperare lunis 14 de martzu ebbia, non pro 15 dies, comente est essidu in sos “social” in custas oras. L’ant dadu a ischire in acabbu de s’assemblea fata eris sero in Tramatza.
Sa protesta est ligada a su prètziu de su carburante in Sardigna, ma peri a su rincaru de sos trasportos marìtimos, de sa manutentzione de sos mezos e de sas gommas. Totu costos in prus chi sunt ponende a sa prova sas aziendas de s’autorasportu chi, cun s’isciòperu de su 14 de martzu cherent dare unu singiale forte a sos tzitadinos e a sas istitutziones.
Una cosa est sigura: no ant a firmare su trasportu de sas mertzes pro 15 dies ca diat pòdere paralizare sa Sardigna, cussiderende chi cada mertze biàgiat cun mezos gommados.
A dare sa noa frassa eris est istadu unu messàgiu àudio e àteros in sos “social” ponende in pistighìngiu unu pore de gente, curta a si fàghere iscortas de màndigu e benzina.
Podet peri dare chi s’isciòperu de lunis non si fatzat, ca sos autotrasportadores ant pedidu unu addòbiu urgente cun s’assessore regionale a sos trasportos Giorgio Todde.
Mariantonietta Piga