B’at perìgulu mannu pro sas minetzas DdoS e cripto: sos atacos SSH si sunt isparghende. A dare sa nova sunt sos chircadores de su AhnLab Security Emergency Response Center. Sos espertos faeddant de un’undada noa de atacos contra a sos servidores Linux chi fartant de protetziones.
Sos assachiadores impreant custos servidores pro installare aplicatziones chi iscansionant sas ghennas, e istrumentos de atacu cun ditzionàriu.
Una borta agatados sos sistemas vulneràbiles, sos malintentzionados los ponent in sa rete pro creare criptovalutas e in sas botnet DdoS.
Ma ite est su SSH? Connotu finamentas comente Secure Shell, est unu protocollu de livellu de rete impreadu pro su controllu e sa connessione segura in unu canale critografadu; permitit de esecutare cumandos cun seguresa in unu computadore remotu, operare àteras atividades, imbiare file e impreare servìtzios de rete.
Chie ghiat su progetu malèsigu proat a intzertare sas credentziales pro nch’intrare in unu servidore SSH. Su scansionadore chircat sos sistemas in ue est ativa sa ghenna 22 chi est collegada a sos servidores Secure Shell e, si s’operatzione resesset, si difundent aplicativos dannàrgios.
E gasi sighit sa cadena de infetziones.
Gianfranca Orunesu
Leave a comment