Sos giòvanos de Sòrgono non cherent chi s’ospidale Santu Camillu nche torrret a nudda. E non cherent chi nche torrent a nudda totu sos servìtzios essentziales de su territòriu. Issos ant iscritu una lìtera a s’Unione Sarda. In custa lìtera ant craridu ite cherent. In prus, pedint a sos giòvanos suta de sos 40 annos, de Mandrolisai e Gennargentu, de s’unire a issos. Sa lìtera l’ant iscrita in italianu e in limba sarda comuna. Custu chi publicamus est su testu in lsc.
………………………………………….
Semus is giòvanos under 40 de su Gennargentu-Mandrolisai, sa parte manna de is cales bivet su territòriu ògnia die, ma fintzas àteros chi sunt larganos pro traballu o istùdiu. Creimus chi su tzentru Sardigna tèngiat unu benidore de potentzialidades de ispossiàre in su fronte produtivu, sotziale e culturale. Semus impinnados pro ddas contivigiare in diversos àmbitos e modos, pro chi su destinu de is biddas nostras non siat ispopulamentu e acunortu. Ma, sende chi nois·àteros faghimus sa parte nostra, creimus chi non siant prus crastinàbiles is respostas a pitzu de sa contratzione progressiva de is servìtzios essentziales, sena de is cales non faghet nemancu a s’imaginare sa vivibilidade de su territòriu nen is prospetivas de isvilupu. Intre custos servìtzios b’est sa sanidade chi, cun su declinu costante de is prestatziones e de is orgànicos de su PO San Camillo de Sòrgono, riferimentu pro 17 milla persones, arriscat de tocare unu puntu sena furriada.
Sa Redatzione
Leave a comment