Ocannu si contant chentu annos dae su comintzu de sa Gherra Manna, sa prima gherra mondiale de su 1915-18 in ue sos sardos ant dadu unu contributu mannu de sàmbene e vidas a sa “pàtria” italiana. B’at medas maneras pro l’ammentare, e difatis s’ischit de unu muntone de initziativas chi depent mòvere, ma nois de Limba Sarda 2.0, bos proponimus un’àtera manera de l’ammentare.
Unu pagu de tempus a como, s’editore Condaghes at imprentadu unu romanzu de Larentu Pusceddu “Sordadu Nangu, de gherra e de amore” chi, a bisu nostru, leghe-nde-lu, podet èssere sa manera pretzisa de torrare a abaidare cun sos ogros de oe a sas peleas de tando. Finas ca, a lèghere unu libru in sardu, faghet semper bene, mescamente in custos annos chi sa literadura sarda (in sardu) est andende prus a grae.
Su contu est custu. Unu sordadu partit pro sa Gherra manna de su ´15-18, arruoladu in sa Brigata Tàtari. Comente a medas sardos, no at a torrare prus a sa terra nadia. L´at a torrare a bìdere cun sos ogros de Caderina, una crocerossina chi l’at assistidu cun amore in s´ispidale de campu, bènnida in Sardigna pro connòschere sos parentes suos. In su contu, Nangu, unu giòvanu vitale e balente iscoberit su mundu ipòcrita de sa gherra, in ue ti bochint si non bochis, in ue sos machines de sos òmines giòcant cun sa vida de sos innotzentes. Ma connoschet s´amore puru.
Larentu Pusceddu, s’autore, est nàschidu in Oroteddi (NU) in su 1947. Diplomadu in Agrària, est dirigente sindacale de sa CGIL in Siniscola inue istat dae su 1973 cun mugere e duos fìgios. At collaboradu cun giornales e televisiones: Sardigna, Natzione Sarda, La Nuova Sardegna e Telesardegna.
L´an dadu riconnoschimentos in prémios literàrios: Città di Ozieri, Meilogu, Romàngia, Bonorva, Macumere, Durgale, Oroteddi, Núgoro, Mamojada, Casteddu, Pasada, Ossi, Mores, etc. At pubblicadu: Dae s´umbra de s´ístoria (LP); sos romanzos “S´àrvore de sos Tzinesos”, “Mastru Taras”, “Su belu de sa bonaura”; “Pipinidas e iscazas” (contos pro feduliu); “Dona Mallena”. “S’arvure de sos Tzinesos” est unu romanzu de sos primos essidos in limba sarda e tando, a sa essida, aiat fatu dibàtere meda.
Pusceddu est de seguru un’iscritore de importu mannu pro sa natzione sarda, a bias ismentigadu e non si ischit su pro ite.
Leave a comment