“Sos datos de sa presèntzia de sos turistas in Sardigna pro sas festas de Pasca sunt unu singiale profetosu pro unu de sos setores de importu de s’economia sarda. A dispetu de sas dificultades, est torrada sa gana de biagiare e in medas ant seberadu s’ìsula nostra pro si fàghere una vacàntzia, mancari lestra”. A lu narrere est su Presidente de sa Regione Christian Solinas bidende sos nùmeros de sos arribos a Sardigna, a manera particulare cussos chi ant dadu a ischire sos 3 iscalos aeroportuales: prus de 110mìgia intre Casteddu, Terranoa e S’Alighera.
Sa cunfirma chi su mercadu internu e su turismu internatzionale sunt torrende a si mòere, a pustis de su disacatu de sos annos colados pro neghe su Covid.
“Sas vacantzias de Pasca fiant sas proas generales de s’istajone istiale, – at sutaliniadu s’assessore regionale de su turismu Gianni Chessa – so isperantzosu ca sas atziones de promotzione fatas finas a como dae sa Regione cunfirmant chi sa Sardigna est unu de sos logos preferidos dae sos turistas, mescamente italianos”.
Mariantonietta Piga