S'iscoberta de su Brasile

S'iscoberta de su Brasile

Su 26 de ghennàrgiu de su 1500 sos europeos avistaiant e tocaiant pro sa prima borta terras brasilianas.

Protagonistas de s’avenimentu istòricos fiant istados sos marineris de s’ispeditzione capitanada dae Vicente Yañez Pinzón.

Aparteniat a una famìllia de marineris de Palos de la Frontera, acanta de Sivìllia.

Paris cun sos frades s’esploradore aiat fatu parte de sa prima ispeditzione de Cristoforo Colombo, comente capitanu de sa Niña.

Che a issara sa flota fiat partida dae su portu de Palos, su 19 de santandria de su 1499. De s’ispeditzione faghiant parte bator caravellas. S’impresa fiat organizada dae Pinzón etotu, ca s’annu in antis sos Res Catòlicos aiant permìtidu esploratziones privadas.

Durante sa navigatzione sas naves de su capitanu aiant istabilidu aterunu primadu: fiant istadas sas primas imbarcatziones ispagnolas a navigare a suta de s’ecuatore.

A sa punta de terra avistada dd’aiant postu cabo de Consolación, chi sos portoghesos aiant cambiadu a coa in cabo de Santo Agostinho.

Una borta istabilidu chi si trataiat de unu subcontinente nou, difatis, su Brasile fiat passadu suta de su domìniu de sos portoghesos, cunforma a su tratadu de Tordesillas. S’acordu, sigladu in su 1494, istabiliat una lìnia chi partziat sas terras noas intre Ispagna e Portogallu.

Sos marineris ispagnolos fiant istados finas sos primos europeos chi aiant esploradu e navigadu su riu de sas Amàtzones, frùmene chi Pinzón dd’aiat postu a nùmene Marañón.

Se mese de ghennàrgiu est presente in s’istòria coloniale de Brasile finas ca sa die de annu nou de su 1502 su navigadore portoghesu Gaspar de Lemos fiat intradu in sa baja de Guanabara e dd’aiat postu, pròpiu in riferimentu a sa die de s’iscoberta, Rio de Janeiro.

In ie sos portoghesos aiant fraigadu sa tzitade chi fiat bènnida a èssere sa capitale istòrica e moderna de Brasile, finas a su 1960 cando su ruolu est passadu a Brasilia.

Nàschidu in su 1462, Vicente Yañez Pinzón est mortu in su 1514.

(gianni muroni)

Leave a comment

Send a Comment

S'indiritzu email tuo no at a èssere publicadu.