S'irlandesu, limba de Europa

S'irlandesu, limba de Europa

– de Salvatore Serra –

Sa limba irlandesa at otentu su status prenu  de limba ufitziale  e  de traballu  in sa UE, ca est agabbadu un’acordu  de dèroga chi fiat in vigore dae su 2007.

In su  2004 Dublinu aiat pedidu  de pònnere s’irlandesu  comente limba ufitziale de s’Unione Europea. Su primu de ghennàrgiu de su 2007 l’aiant dadu, a custu idioma, su status de  limba ufitziale  e  de traballu. Belle gasi, b’aiat àpidu un’acordu de dèroga, ca fiant tropu pagos sos tradutores, e custu diat àere postu làcanas  a sa cantidade de documentos  chi si podiant bortare in irlandesu. Custu acordu de dèroga  est agabbadu su 31 de nadale de su 2021, e sa limba irlandesa tenet como su matessi gradu de sos àteros  23 idiomas ufitziales  de s’  Unione Europea.

Duncas, dae ocannu, totu sa legislatzione de s’Unione at a tènnere sa versione sua finas in custa limba gaèlica. Dae custu ant a nàschere oportunidades de traballu pro sos operadores.  In custu mamentu b’at unos  170 tradutores,  ma si pensat chi nd’ant a cramare àteros 200.

“S’agabbu  de su status de dèroga de s‘irlandesu  in s’Unione Europea  est unu passu de importu pro s’isvilupu e su tempus venidore de sa limba. S’irlandesu   como est in su matessi gradu de sos àteros idiomas ufitziales de sa UE e custu at a afortire  sas relatziones  intre sos tzitadinos  e sos sistemas amministrativos europeos,” at naradu su responsàbile  de su guvernu irlandesu Jack Chambers, pretzisende chi “cun s’emendamentu a sa lege subra de sas limbas ufitziales firmadu dae su Presidente de Irlanda in su  2021, su rolu de s’irlandesu  in sos sistemas amministrativos istatales e europeos at a tènnere unu megioru mannu.”

Ligàmene: https://www.jurist.org/news/2022/01/irish-language-gains-full-official-and-working-status-in-eu/

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *