– de Salvatore Serra –
Alberto Rizzoli est nàschidu in Roma, e tenet 29 annos. Istat in Londra e dae su 2018 est amministradore delegadu de V7, una sotziedade chi òperat in su campu de s’ intelligèntzia artifitziale e dae pagu at otentu su segundu finantziamentu de capitale de arriscu: 33 milliones de dòllaros. V7 est una prataforma chi cunsentit a sos modellos di intelligèntzia artifitziale (IA) de traballare meda prus in presse. Sa visione pro elaboradore est cussa branca de sa IA chi s’òcupat de reconnòschere sos ogetos in intro de sas imàginaes. Si a su sòlitu b’at operadores umanos chi depent crarire a sa IA sa natura de cada ogetu in un’operatzione chi si narat etichetadura, V7 permitit de illestrire custu protzessu lassende chi siat sa IA etotu a etichetare sos ogetos, pro fàghere controllare totu, pustis, dae sos umanos, sos cales depent fàghere, duncas, sceti una parte mìnima de su traballu.
Narat Rizzoli: «Apo tentu semper sa passione de gioghitare cun sos elaboradores. In su 2013 so andadu a fàghere sa Business School in Londra. In cui apo connotu a Simon, su sòtziu meu isvedesu. Cun issu apo fatu un’ hackathon, una casta de maratona pro programmadores: sas pessones si ponent totus in pare e iscrient unu programma in 24 oras sena pasare. Nois amus isvilupadu unu programmeddu pro impitare sos televisores de sos pub comente videogiogos arcade. Su bellu fiat chi su telèfonu diveniat su controllore de su giogu. Nos semus ispassiados meda a beru, dae cue est nàschida s’amigàntzia nostra e amus collaboradu semper. Pustis so andadu a MountIAn View, in California, pro leare parte in unu programma internatzionale de su NASA Ames Research Center. In cue apo cumintzadu a traballare cun sa IA. Fiat su 2015, duncas aplicatziones medas chi como cunsideramus iscontadas in cussu tempus non bi fiant»
Su primu imbentu de Alberto e Simon est istadu IApoly. un’aplicatzione pro ipovedentes chi, incuadrende un’ogetu cun sa fotocàmera de su telèfonu, lu reconnoschet e lu descriet a boghe arta a chie l’impitat. Como s’aplicatzione no est prus a disponimentu, ma s’assimìgiat a Google Lens. Ischiat a assebertare su colore de un’ogetu e a recònnoschere 5 mìgia categorias. Gente meda l’impitaiat pro fàghere s’ispesa. Ma pustis ant pensadu de punnare a àteru, a imàgines chi in internet non bi sunt.
S’idea fiat chi, pro nàrrere, a unu dutore o a un’avocadu, su chi lis interessat est a bìdere su chi sos àteros non bident, chi siat una massa tumorale cuada o una trampighedda chi permitit de bìnchere una càusa. A sos professionistas, difatis, no lis interessat chi sa IA iscat a reconnòschere canes e gatos, ma a bìdere cales partes de unu motore sunt essidas difetosas dae una fàbrica, a cumprèndere cale dente est cariada, a agatare sas tzèllulas cantzerògenas in unu tèssidu. Sos impreos sunt diferentes a beru. Cando càrrigas una fotografia in IArbnb, unu sistema de IA l’analizat pro cumprèndere si torrat cun sa descritzione chi as dadu de s’acotu. Si as iscritu chi b’est sa bartza, e intames in sa fotografia b’at una dutza, ti sinnalant. Sa prataforma l’impitant finas in s’anàlisi de sos isport. Sas iscuadras l’impreant pro definire sas prestatziones de sos giogadores in cussa partida determinada: pro nàrrere, si sos giogadores sunt currende o si sunt colende sa botza prus de su sòlitu.
Su disafiu prus mannu de sa IA est a li fàghere cumprèndere chi no ischit totu. Sa IA no ischit de no ischire; duncas, finas cando s’est faddida de su totu, at a presentare un’informatzione comente chi siat fatuale e aberguada. Su remèdiu est sa generalizatzione. Cheret nàrrere a leare sos datos dae totu internet e non dae un’atividade particulare. In antis sa IA imparaiat dae un’imàgine, como imparat finas dae sos giassos informàticos, tenende contu de sos cummentos chi li dant cuntestu. E imparat a simulare su pensamentu umanu.
Ma sa IA, in parte de sos umanos at a intrare ? Paret chi nono. Pro nàrrere, ChatGpt – chi iscriet testos – est bravu meda in sa grammàtica ma no est fatuale. Si li preguntas cale est s’animale de abba prus lestru t’at a nàrrere, “astore”. Bat de pensare, imbetzes, chi sa IA at a divènnere una casta di copilota. Su volante at a èssere in manos de un’èssere umanu chi bi ponet su gèniu e controllat totu, cando chi sa IA bi ponet su denominadore comunu mìnimu intre sos prompt (si narant gasi sos cumandos chi si dant a sa IA pro li fàghere creare carchi cosa) chi retzit. At a èssere su faghidore de sa prima manu, ma abbarant sos umanos a bi pònnere su gèniu issoro pro fàghere sa versione finale.
Leave a comment