Si nch’est andadu su 24 de martzu a 94 annos Gordon Moore, informàticu, ingegneri e imprendidore istadunidense. Nòdidu pro èssere istadu co-fundadore de sas aziendas Fairchild Semiconductor (1957) e Intel (1968), a Moore lu connoschimus mescamente pro àere elaboradu sa “lege de Moore” in s’àmbitu informàticu pro su chi pertocat s’evolutzione de sos chip pro sos computer.
Fiat su 1965 cando, pro mèdiu de unas cantas osservatziones empìricas, s’ingegneri elaboreit sa teoria sua impreada in totue (mancari siat belle superada). In realidade, sas leges de Moore duas sunt. Sa prima narat chi sa cumplessidade de unu microtzircùitu raddòpiat onni 18 meses. In su 1965, s’informàticu afirmeit chi sas prestatziones de sos microprotzessores raddopiaiant cada annu. Sa teoria la torreint a formulare intre sos annos 70’ e ‘80, giughende su raddòpiu a 18 meses. Si sas prestatziones de sos protzessores (e su nùmeru de transistors) raddòpiant cada 18 meses, podimus pensare chi, pro nàrrere, sos dispositivos podent bantare velotzidade de elaboratzione prus elevada e mègius prestatziones. Ma s’aumentu de sos transistors pro mèdiu de custa lege tenet finamentas conseguèntzias pro su chi pertocat sa capatzidade de archiviatzione de sos datos chi si traduet in prus cantidade in ispàtzios minores. Custos sunt petzi unos cantos esèmpios de s’impatu de custa teoria in sa tecnologia.
Sa segunda lege de Moore tenet interpretatziones diferentes. Pro nàrrere, una sustenet chi su costu de sas aparechiaduras pro fraigare sos semicondutores raddòpiat cada bator annos.
«Su mundu at pèrdidu unu gigante, unu de sos fundadores de sa Silicon Valley e unu visionàriu de a beru chi at abertu su caminu a sa rivolutzione tecnològica» at iscritu in Twitter Tim Cook, CEO de Apple.
Gianfranca Orunesu
(foto Wikimedia Commons cun su permissu de su Science History Institute)
Leave a comment