de Luisu Wittgenstein
Pro ite naschet un’istandard?
Un’istandard naschet pro ite b’est un’esigèntzia, cumpartida dae prus persones, de si pònnere de acòrdiu a pitzus de comente fàghere una cosa. In custu sentidu non podent esìstere istandard personales (si una cosa est personale no est istandard!) e non esistent istandard chi non serbint a si pònnere de acòrdiu a pitzus de una chistione.
Comente naschet un’istandard?
Un’istandard podet nàschere in duas maneras. Una est ca un’autoridade morale, giurìdica o sotziale reconnota da chie depet retzire s’istandard declarat cale est sa manera istandard de fàghere una cosa. S’àtera manera est cussa ca cussos chi depent impreare e retzire s’istandard si ponent de acòrdiu intre issos. Pro custu un’istandard podet nàschere isceti si chie ddu proponet est un’autoridade morale, giurìdica o sotziale e duncas si is chi ddu diant a dèpere impreare ddu impreant che a istandard, o isceti si chie diat a dèpere impreare custu istandard si ponet de acòrdiu cun is àteros chi ddu diant a dèpere impreare e duncas si is chi ddu diant a dèpere impreare ddu impreant che a istandard.
Cando mudat un’istandard?
Un’istandard mudat cando chi ddu impreat (o chi ddu diat a bòlere impreare) cumpartzit su pensamentu chi bi siant chistiones noas chi s’istandard non ponet de acòrdiu, o chi custos cumpartzint su pensamentu ca bi siat una manera mègius de si pònnere de acòrdiu a pitzus de is cosas betzas. Duncas un’istandard no at a mudare si chie ddu impreat (o ddu diat a bòlere impreare) non pensat chi bi siant chistiones noas o chi bi siant maneras mègius pro risòlvere is chistiones betzas.
Comente mudat un’istandard?
A manera simigiante a comente naschet, un’istandard podet mudare isceti in duas maneras. Sa prima est chi un’autoridade morale, giurìdica o sotziale reconnota da chie depet retzire s’istandard declarat comente mudat s’istandard e duncas chie diat a dèpere impreare s’istandard nou ddu impreat che a istandard. S’àtera manera est ca is chi diant a dèpere impreare s’istandard nou si ponent de acòrdiu cun is àteros chi diant a dèpere impreare s’istandard a pitzus de is mudàntzias e duncas si is chi diant a dèpere impreare impreant s’istandard nou che a istandard.
Cando morit un’istandard?
Un’istandard morit cando chie ddu diat dèpere impreare che a istandard non ddu imperat prus.
Cantu is chistiones personales, sas brigas, is faeddos malos, is cuntierras sena sentidu e is gherras serbint a fàghere nàschere, mudare o mòrrere un’istandard?
Nudda.