Su binchidore de su Ses Natziones s’at a ischire in s’ùrtimu turnu, a pustis chi s’Irlanda at pèrdidu partida e primadu cun sa Frantza, como prima. In curta pro su tìtulu finas s’Inghilterra.
In sa die de sàbadu, 8 de martzu, in Dublinu sa Frantza at mustradu a tretos su rugby champagne cosa sua. Giai cun sa prima meta de s’ala Bielle-Barrey, premiadu a sa fine comente su mègius in campu, sos frantzesos ant fatu a cumprèndere chi fiant in unu momentu positivu. Ant finas aprofitadu de sas duas superioridades numèricas temporàneas pro sas ammonitziones de McCarthy in su primu tempus e de Nash in su segundu. Cun sa marcadura de Jegou s’ant asseguradu su bonus ofensivu.
A pustis de àere leadu ateruna meta dae Penaud sos irlandesos ant marcadu duas bortas, sa prima cun sa prima lìnia Healy, a s’ùrtima partida cun sa natzionale in terra irlandesa. Ininfluente, pro su resurtadu, s’ammonitzione a su frantzesu Cros. Ùnica nota istonada s’infortùniu malu, a su 29, a su ghenugru, de su capitanu Dupont.
In sa segunda partida se sàbadu in Murrayfield pronòsticu rispetadu cun sa vitòria iscotzesa, chi giai a su 33° at leadu su bonus cun bator metas. Su Galles però, chi giai in su primu tempus aiat marcadu cun una bella atzione de sos duos neozelandesos de nàschida, cun unu passàgiu de pee in profundidade de Anscombe pro Murray, nch’est resurtadu a marcare tres metas a fila a pare lompende a ses puntos ebbia dae s’iscuadra contrària. In custu modu sos dragones ant leadu bonus ofensivu e difensivu puru.
Domìniga in Twickenham s’Itàlia at pèrdidu torra malamente, che a in su turnu de in antis cun sa Frantza. S’Inghilterra at bintu cun sete metas in totu. Sa prus bella sa penùrtima, in ue bator giogadores, Itoje, Curry, Mitchell e George, s’ant passadu in pallègiu sa botza chi a sa fine s’ala manca Sleightholme at arrimadu in meta. A tempus iscadidu sos britànnicos ant marcadu ateruna meta cun sa tertza lìnia Earl.
Custos sos resurtados: Irlanda-Frantza 27-42, Iscòtzia-Galles 35-29, Inghilterra-Itàlia 47-24.
(gianni muroni)
Leave a comment