Su 6 de santugaine acabbat sa de sete editziones de su Festival Premio Emilio Lussu, de Casteddu. Sa manifestatzione s’at a concruire cun s’intregu a Sergio Staino de su prèmiu Lussu a sa carriera.
Su Festival, organizadu dae su sòtziu L’Alambicco cun su cuntributu de sa Regione Autònoma de Sardigna e sa Comuna de Casteddu e cun su patrotzìniu de sa Càmera de sos Deputados, at bidu sas dies coladas s’interventu de Violante Saramago Matos, fìgia de s’iscritore portoghesu José Saramago, intervènnida in collegamentu vìdeu.
Biòloga, ativista polìtica e iscritora, massimamente de contos pro pipios, at chistionadu cun Daniela Marcheschi e cun Luísa Marinho Antunes, professora de literaduras cumparadas in s’Universidade de Madeira.
Violante at faeddadu de su babbu, premiadu cun su Nobel pro sa Literadura in su 1998, narende ca segundu issa fiat unu filòsofu chi s’espressaiat pro more de s’iscritura.
Pròpiu s’allega ufitziale lèghida in Istocolma pro s’intregu de su prèmiu est, a pàrrere de sa fìgia de Saramago, sa mègius sìntesi de su pensamentu suo, dedicadu massimamente a su problema de sos deretos tziviles.
Aterunu interessu de s’autore lusitanu, mancari fiat àteu, fiat sa religione. Metàfora de custa gherra intre bene e male est su tzurpìmene, chi est presente meda in sos iscritos suos, a distintu in Ensaio sobre a cegueira, romanzu de su 1995, chi su regista brasilianu Fernando Meirelles at trasformadu in pellìcula, cun su tìtulu Blindness, in su 2008.
S’addòbiu virtuale at rapresentadu finas s’ocasione pro presentare Le malizie delle donne, de Luísa Marinho Antunes, publicadu dae Marietti.
Marcheschi e Marinho Antunes ant in fines partetzipadu a sa presentatzione de sa rivista literària Fuori Asse, publicada dae Cooperativa Letteraria, paris cun sa diretora Caterina Arcangelo e Mario Greco, Guido Conti, Alessandro Macis, Elisabetta Randaccio e Patrizia Masala.
(gianni muroni)