In iscola, su logu de s’annestru de s’ingèniu umanu e de s’arresonu formativu pro sas generatziones noas, b’at semper prus intelligèntzia artifitziale. Sos datos essidos a campu dae una chirca de Tgm research/NoPlagio.it, movende dae unu campione istatìsticu de 1007 pitzocos, nos narant chi una pertzentuale manna de sos istudiantes italianos intre sos 16 e sos 18 annos impreat sas chatbot.
A minudu: su 71% l’impreat pro chircare informatziones; su 60% pro acumprire a sos còmpitos; su 33% pro imparare; su 18% pro rispòndere a sos test; su 21% comente assistente personale; su 13% pro iscrìere sàgios. Sos autores de sa chirca, faeddende de sa netzessidade de un’impreu dèghidu de sas ainas de intelligèntzia artifitziale, narant deretu chi «non cherimus demonizare». Ma fatu-fatu annanghent unu messàgiu a sos dotzentes: «sunt issos chi diant dèvere aprofondire sa matèria pro chi sos pitzocos impreent s’Ia in manera curreta».
Sos datos, semper e cando, mustrant finamentas chi sos dischentes contivigiant sa duda: mancari siat solu su 4% de issos a nd’àere una visione negativa, su 64% de sos intervistados timet un’impreu sena lìmites de s’Ia e su 54% narat de non si fidare de su totu de sos contenutos produidos dae ChatGpt e trastes simigiantes. Analizende sos datos sòtziu-anagràficos de s’inchiesta podimus bìdere chi s’impreu prus artu bi l’ant in sas tzitades de Nàpoli e de Torinu (60%); chi sos de sèighi annos l’impreant de prus de sos cumpàngios de 18 (unu +3%); chi, pro parte issoro, sos de 18 (71%) diant pàrrere prus intentzionados de sos de 16 (63%) a l’impreare dae como in susu; chi sos pitzocos (71%) sunt de prus de sas pitzocas (65%). Ma s’Itàlia no est sola. Cunfrontende sos datos cun sos de sos àteros Paisos europeos, nos sebestamus chi s’impreu de s’Ia in iscola est artu fintzas in Germània (63%) e in Ispagna (70%).
Gianfranca Orunesu
Leave a comment