Est essidu su 4 de austu su trailer ufitziale de Saturnalia, su videogiogu de gènere survival-horror ambientadu in sa Sardigna de sos annos ‘80 e isvilupadu dae Santa Ragione.
At a èssere pròpiu s’ìsula s’iscenàriu printzipale, cundidu dae elementos de folklore ammisturadu cun sos Saturnàlios, est a nàrrere sos fèstival itàlicos nòdidos in ue s’òrdine fiat bortuladu e su caos regnaiat sena istorbu perunu.
Su videogiogu permitit de esplorare su bidditzolu fitìtziu de Gravoi: cadaunu personàgiu depet sòrvere enigmas e subravìvere a sos mostros.
Comente si cumprendet dae su trailer, una caraterìstica de interessu sunt sas penalidades: si a unu personàgiu lu prendent, lu podent sarvare; ma si su giogadore perdet totu sos personàgios suos, mudat s’istrutura intrea de sa tzitade.
Pro como non s’ischit cando Saturnalia at a essire pro neghe de sa pandemia Covid (difatis fiat previstu pro su 2020), ma est craru chi in sos meses benidores at a èssere possìbile a fàghere sos contos cun iscenàrios inchietantes chi bident s’ìsula nostra protagonista.
Gianfranca Orunesu