In sos ùrtimos 150 annos sa tzitade de Tàtari at connotu sa presèntzia de tres presones diferentes in tres giassos diferentes.
Finas a sa fine de su de deghennoe sèculos sos delincuentes fiant inserrados in sa presone de Santu Lenardu, chi fiat a costàgiu de su palatzu de Ùsini, in ue oe s’agatat sa biblioteca comunale, in sa Carra Manna, oe pratza Tola.
Sa presone fiat tìpica de cuddos tempos de s’edade mèdia, bidu chi est nàschida in su de trèighi sèculos, cun tzellas minores e cunditziones terrìbiles. L’aiant postu Santu Lenardu a pustis chi b’aiant fatu a intro una capella dedicada a su santu.
Duncas in sa segunda metade de su sèculu aiant leadu se detzisione de fraigare una presone noa, prus manna e prus pagu umiliante pro sos presoneris. Su logu seberadu fiat su cuartieri nou chi dae in ie a pagos annos diat leare su nùmene de sa crèsia parrochiale: Santu Zusepe.
Su fràigu nou puru at leadu su nùmene dae una capella chi s’agataiat in ie a curtzu, sa de Santu Sebastianu, in ue tzelebraiant sos paras domenicanos, chi a costàgiu teniant su cumbentu.
In su 1871 in fines s’òpera fiat acabbada e at cumintzadu sa vida sua. Durante sos annos est istada inghiriada dae palatzos e carreras noas finas a èssere, dae zona perifèrica, parte de su tzentru tzitadinu.
A costàgiu suo aiant fraigadu su tribunale, durante su ventènniu fascista. Pro fàghere logu a su palatzu de giustìtzia est istada sacrificada una de sas turres angulares de vedeta chi s’agataiat in ue est como bia Roma.
Passende sos annos però sa presone at cumintzadu a no èssere prus adata comente logu de reclusione. In su 2013 est istada inaugurada cudda noa, in sa fratzione de Bancali. Custa borta duncas foras de su tzentru urbanu. Giai in cuddu annu est cumintzadu su trasferimentu de sos primos presoneris.
Sa presone de Santu Sebastianu, oramai parte de su paesàgiu tzitadinu, intre su tribunale e sa crèsia, est istada serrada de su totu in su 2015.
(luca foddai)
Leave a comment