Sas launeddas, istrumentu sìmbulu de sa traditzione musicale sarda, isbarcant in Còrsica. Giòbia 25 de cabudanni in s’auditorium de Pigna, bidda in s’ala nord de sa regione, est in programma una manifestatzione musicale ammaniada dae sa Fondazione Maria Carta e dae su Centro di Ricerca Musicale Voce, chi sa sede est pròpiu in Pigna. Sa collaboratzione intre sas duas entidades de sas duas ìsulas sorres est cumintzada in su 2016.
Su cuntzertu, chi at a cumintzare a sas noe de sero, est intituladu Isule Incantate. Sa die in fatu, in Poretti di Brando, acanta de Bastia, est in programma aterunu ispetàculu. Totus duas manifestatziones sunt organizadas dae s’assòtziu Camerata Figarella.
Protagonistas de s’initziativa ant a èssere, duncas, sas launeddas, cun sa presèntzia de sos sonadores Andrea Pisu de Biddeputzi e Luca Schirru de Ceraxus.
Custas esibitziones rapresentant s’ocasione pro s’istitutzione culturale intitulada a sa cantadora silighesa de cumintzare sa campagna pro chi sas launeddas siant reconnotas comente patrimòniu de s’umanidade.
In prus custas initziativas ant a permìtere a sas fortzas culturales de sas duas regiones de arresonare de unu tema chi pertocat sas duas ìsulas: s’ispopulamentu de sas biddas prus piticas. Sa Fondazione dae annos amndat a in antis s’initziativa Freemmos, pensada pròpiu pro sensibilizare subra de custa chistione.
Su logu seberadu pro su primu cuntzertu est un’esèmpiu virtuosu de comente si podet firmare s’emorragia de persones, a distintu de sos prus giòvanos. Difatis sa bidda de Pigna, chi tenet unos chentu abitantes, est crèschida comente gente in custos ùrtimos annos pròpiu pro more de atividades culturales, massimamente musicales.
Ant fatu un’auditorium, sunt nàschidas butegas de liutaju e una residèntzia musicale pro retzire a sos artistas chi lompent dae foras.
Pro sa Fondazione Maria Carta ant a partetzipare su presidente, Leonardo Marras, e su responsàbile de su comitadu iscientìficu, Giacomo Serreli.
(gianni muroni)