Domìniga e eris mangianu si podiat votare pro annoare sos cussìgios comunales e sos sìndigos de biddas e tzitades de importu. Bos presentamus sos resurtos de sos tzentros prus mannos.
In Terranoa cun prus o mancu su chimbantaduos pro chentu de sos votos Settimo Nizzi at logradu su de chimbe mandados, barighende sa coalitzione de Augusto Navone.
Pietro Morittu at bìnchidu in Carbònia cun belle su sessantasès pro chentu ghiende sos partidos de tzentru-manca.
Marco Siddi est su sìndigu nou de Santuidu isceti pro more de deghe votos.
In Serramanna Gabriele Littera, unu de sos fundadores de Sardex e serente a s’ambiente indipendentista, est divènnidu sìndigu cun su chimbantatrès pro chentu.
In Sàrdara est coladu a sìndigu su coronellu de s’esèrtzitu Giorgio Zucca chi at barigadu Ercole Melis, su vice-sìndigu betzu.
Una mudada manna est acontèssida a Biddacidru in ue su sìndigu betzu, Marta Cabriolu, at leadu petzi su deghessete pro chentu, in su mentres Federico Sollai at logradu su sessantoto pro chentu de sas preferèntzias.
In Thiniscole at bìnchidu Tardelli, gasi est connotu Gianluigi Farris, chi est divènnidu sìndigu cun belle su trinta chimbe pro chentu.
Intre bìndighi dies s’andat a su ballutàgiu in Cabuderra, a si disafiare sunt duos Beniamino, Piga e Garau.
In sas comunas cun una lista ebbia, s’ùnica bidda in ue no si nche est segudadu su quorum est Nureci.
(redatzione)
Leave a comment