Dae martzu de su 2024 sa Bulgaria e sa Romania ant a intrare, ma non de su totu, in s’àrea Schengen. A intro de custa zona, chi leat totu s’UE francu Irlanda e Tzipru, sas persones podent biagiare cun cuntrollos prus dèbiles e cun una libertade prus manna.
S’acordu no est istadu simple. Mescamente s’Àustria non cheriat s’intrada de custos duos Paisos ca est timende chi abèrgiat sa gianna a sos migrantes econòmicos. Tando sos duos Paisos noos ant a fàghere parte de s’àrea, ma petzi pro sos biagiadores chi suprint cun aèreos o cun nàvios, ma non cun trasportos de terra. Una diferèntzia, est craru, intre chie est ricu e chie nono.
A su matessi tempus s’UE at a cumpidare meda de prus sa làcana intre Turchia e Bulgaria, ca un’àtera timoria de carchi Istadu de Europa, est s’intrada de sos pròfugos, chi su guvernu Erdogan est impitende comente arma contra a s’Unione dae tempus.
Su sèberu sighit sa punna de agiudare sos Istados in s’Est de su Continente a s’acurtziare a Bruxelles, istesiende·los dae sa Rùssia e dae sa Tzina. Agiudende fintzas unu caminu de crèschida democràtica. Impèllida nòbile chi però, a pustis de custos acordos, paret brutada dae carchi ipocrisia.
Gabriele Tanda
Leave a comment