Si narat Sardum su giogu de cartas de sa Sardigna bogadu a campu e promòvidu dae sa Pmi Innovativa Informatica Srl.
Su responsàbile de su progetu, Giùliu Setzu, l’at presentadu in s’Istitutu cumprensivu Businco de Jertzu a istudentes chi andant dae sos 13 a sos 18 annos.
Sardum est un’atividade lùdicu – educativa chi punnat a pònnere in contu sas galanias de sa Sardigna, mescamente in sos giassos internos che a s’Ogiastra. Previdet dae duos a bator giogadores e unu màtzulu de 46 cartas: 27 cartas “element” chi podent èssere ligadas a sas bellesas de su panorama, a sos produtos de s’enogastronomia o a sas òperas de arte; 6 cartas ‘trouble’, est a nàrrere imprevistos chi podent dare o bogare puntos, e 13 cartas ‘missione’ chi ghiant su giogu. In su cumintzu unu giogadore leat una carta missione, chi podet èssere, pro nàrrere “panoramas de Sardigna”: chie collit prus cartas cunforma a sa missione binchet sa partida.
Como no istentant a sighire a presentare Sardum in àteras iscolas o logos de addòviu de Sardigna.
(sa redatzione)
Leave a comment