Sa Sardigna mudat colore un’àtera borta. Como est birde, chi cheret nàrrere chi est una de sas regiones europeas prus seguras chi bi sunt. Custu naschet dae sos nùmeros, minores de a beru, de sos contàgios (nemmancu bintighimbe cada chentu mìgia abitantes) e de sos letos ocupados dae malàidos de Covid (su tres pro chentu).
Paret totu torradu comente a in antis, ma bisòngiat de si mantènnere abbistos. A lu nàrrere est fintzas su Presidente Solinas chi, posca de àere bogadu sas compidadas in sos portos e aeroportos isetende su passaportu sanitàriu, at festadu su birde europeu narende a totus chi bi cheret galu responsabilidade. Custas paràulas naschent ca in custas dies sunt crèschidos sos focolàios de Aritzo e de Trinitai, s’est agatende meda sa variante Delta, chi benit dae Inghilterra e contàgiat de prus, mescamente sos prus giòvanos, e in su mentres non s’est agabbadu cun sos vatzinos.
Sa timoria de gente meda est chi semus torrende a bìvere sa matessi situatzione de s’annu coladu: pagos controllos, turistas medas e su Covid chi paret iscumpartu. Isperemus de a beru chi in atòngiu non amus a bìdere torra sos ispidales in dificultade e sa serrada, ca onni borta sunt mortos e poberesa, petzi pro non dare infadu a sos turistas.
(redatzione)
Leave a comment