Mancu comintzadu, su 2021 nos est giai presentende una ghia pro cumprèndere s’andanta de is allegas. Su nono a s’arga nucleare est cosa chi non b’at bisòngiu de dd’argumentare, a su nessi in tèrmines de cantidade. Est una chistione chi aunit su pòpulu sardu deasi comente dd’auneit sa batalla referendària de su 2011. Ma est a sa calidade chi tocat a mirare. Pro unos cantos, medas, su nono a sas iscòrias est s’ocasione de illiberare s’arrennegu issoro chi non resessent o non podent indiritzare cun sa matessi energia contra a sos migrantes pro chistiones de oportunidade polìtica. Pro àteros, medas inoghe puru, est s’ocasione de mustrare unu sentidu chi non bolent indiritzare contra a sos velenos de indùstrias e polìgonos. Tando cheret chi meledemus a fundu in contu de unidade de pòpulu sardu. Cantu podet èssere de giudu una unidade gasi limitada? Tzertu, su resurtu de su referendum, mancari non siat vinculante, est achiridu. Ma chie cheret una Sardigna solidale e sustenìbile cheret chi non si firmet in cue, cheret chi avantzet mancari agatende in caminu (e pesende·las) temàticas chi unànimes non sunt. Pro nàrrere, sa Regione, movende finamentas dae s’unanimidade consiliare, est bantzighende·si in custu tai tai de unidades partziales. Ma est sa matessi Regione chi, afutende·si·nde de pàrreres contràrios, movet conca a Terranoa contra a s’Alan Kurdi e, semper afutende·si·nde de s’antìtesi, lassat chi sos catzadores si movant dae unu Comune a s’àteru in dies “arantzu” cando chi sa matessi cosa no est permìtida a àtere. Curiosidade, in ambas duas chistiones ddoe sunt sos inditos de unu partidu chi mancu sardu est. E beni·mi·nde unidade de sos sardos. Ma in ambas chistiones b’at cherta de cunsensu. Duncas, si ddoe at chi chircat cunsensu movet dae positziones contràrias, est de giudu chi sos chi gherrant pro sa Sardigna de su cras non lìmitent sa mirada issoro pro non pònnere oriolos a sos chi in contu de iscòrias sunt cun nois ma in àteras chistiones nono. At a èssere su traballu passentziosu e coerente de sos chi tenent una visione chi ponet paris giustìtzia sotziale e ambientale (chi posca semus faeddende de sos chi ant animadu su referendum de noe annos a como, comintzende dae sa bonànima de Vincenzo Pillai) a nos nche giùghere conca a unidades populares sas prus avantzadas.
màuru piredda
Leave a comment