“Sardegna Isola Megalitica. Dai menhir ai nuraghi: storie di pietra nel cuore del Mediterraneo”. Est su tìtulu de sa mustra chi nch’at giutu sos repertos sardos peri s’Europa. A pustis de sa resèssida in tres istitutos famados (Berlinu, Santu Pedruburgu e Salonicu), s’ùnica tapa italiana at a èssere in Nàpoli, dae su 10 de làmpadas a su 11 de cabudanni, in su Salone de sa Meridiana de su MANN. E pròpiu in su Salone nch’est lòmpida, dae su Museu Archeològicu Natzionale de Casteddu, s’iscultura de su Pugiladore, unu de sos Gigantes nòdidos de Mont’e Prama. Icona de unu ligàmene intre sas culturas mediterràneas, s’òpera no fiat istada mai imprestada fintzas a como.
Sa mustra est promòvida dae sa Regione Autònoma de sa Sardigna in s’àmbitu de su progetu pluriennale Heritage Tourism dedicadu a s’archeologia, e at retzidu sa medàllia dae su Presidente de sa Repùblica italianu. A curare s’espositzione sunt Federica Doria, Elisabetta Grassi, Maria Letizia Pulcini, Stefano Giuliani e Manuela Puddu cun su coordinamentu de Bruno Billeci e de Francesco Muscolino; su comitadu iscientìficu est formadu dae Manfred Nawroth in pare cun Angeliki Koukouvou, Yuri Piotrovsky e Paolo Giulierini.
S’eventu est su mèdiu pro chi sa Sardigna siat bìvida tràmite su tema de su megalitismu (dae su grecu “mega-litos”, est a nàrrere pedra manna), fenòmenu chi at interessadu s’ìsula dae su Neolìticu fintzas a s’època nuràgica e chi cunsistet in s’apentu a nche fraigare edifìtzios cun elementos lìticos mannos a beru.
Gianfranca Orunesu