S'Arda: su primu grupu sardu pro sa divulgatzione de sas òperas de J.R.R.Tolkien Stefania Carta

S'Arda: su primu grupu sardu pro sa divulgatzione de sas òperas de J.R.R.Tolkien Stefania Carta

“S’Arda” naschet in su 2017 cun s’intentu de creare in Sardigna una sotziedade pro s’istùdiu e sa divulgatzione de sas òperas de J.R.R. Tolkien – unu de sos autores prus mannos de su sèculu coladu -,  unu tzentru indipendente dae s’Itàlia, dedicadu a sos bisòngios de unu pùblicu sardu e chi, in su matessi tempus, s’inserit in su panorama internatzionale de sos istùdios de custu autore.

“Sa limba est su primu signu distintivu de sos pòpulos” iscriat Tolkien in sa mustra “Inglesu e Gallesu”, ma totus sas òperas suas sunt umpridas de unu sentidu de nostalgia pro sas culturas pèrdidas e in custu ispìritu amus fatu de S’Arda una pàgina facebook bilìngue e unu grupu atentu a dare valore a sa limba sarda: ca b’at grupos e sotziedades chi divulgant s’òpera de Tolkien in totus su mundu, ma pro su sardu nois ebbia. Tolkien est un’autore clàssicu, connòschidu e amadu dae gente de ogni edade e istùdiu. Faeddare de literadura arta, ma chi in su matessi tempus praghet a totus, dat valore a sa limba e agiuat a acurtziare sos giòvanos. Pro custa resone sa pàgina facebook est bilìngue e si distinghet pro sa beste culturale de sos cuntènnidos chi iscrimus: dae tradutziones de poesias e bìculos isconnotos in Itàlia a  mustras de su setore, chirchende de tratare s’autore dae ogni prospetiva, arresonende finas de sos tzìnemas e de totus su chi sas òperas suas ant ispiradu. S’impreu de su sardu at unu logu totus suo in sa rubrica “Bonu a l’ischire” in ue presentamus cada òpera in sardu, e in “S’Alfabetu de sos Hobbit” cun su cale chircamus de imparare sa limba a sos sighidores.

In totus sos eventos chi organizamus – paris-paris in sas zonas de Tàtari e de Casteddu – sighende sa traditzione de sas sotziedades Tolkien de totue (sa Die de su Hobbit,su Tolkien Toast, sa Die de Lèghere a Tolkien) su sardu at unu logu de primore. Intre de su 2018 e su 2019 amus organizadu vàrios eventos in ue amus presentadu s’autore e  lèghidu in sardu. In meda sunt acudidos a su Parco di Monserrato de Tàtari pro iscurtare una paristòria dae “Su Sennore de sos Aneddos” in sardu e a sa presentatzione de “The Letters from Father Christmas”. Su Tolkien Toast de ocannu, est istadu fatu totu in limba. Non nos mancant sas atividades prus ispassiosas che sos ispuntinos de sas “Die de su Hobbit” e “Sa Die de Durin” e nemmancu sas atividades in italianu che sa presentatzione de sa tradutzione noa de “Su Sennore de sos Aneddos” in una libreria de Casteddu.

Nos podides sighire in facebook in sa pàgina ufitziale: S’Arda – Smial Tolkien della Sardegna: https://www.facebook.com/smialsarda/  e in sos grupos de Tàtari: https://www.facebook.com/groups/tolkiensassari e Casteddu: https://www.facebook.com/groups/araldicagliari e in instagram: https://www.instagram.com/smialsarda/

 

 

                                                                                                                                                                                                                                                                                                                                                                                                                       Stefania Carta   

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *