A sa fine de su deghennoe sèculos sa tzitade de Tàtari at cumintzadu a crèschere foras de sas muràllias. A ispìnghere pro nch’essire a foras de su perìmetru istòricu fiant, a prus de problemas de caràtere sanitàriu, finas esigèntzias econòmicas. Sos grèmios fiant intre sos prus ativos pedende a sa classe polìtica de fraigare cuartieris noos.
S’espansione de sa tzitade est cumintzada fache a sud, pròpiu foras de sa Porta Casteddu. Sos primos a populare sa parte noa sunt istados sos prus ricos, cun villas e domos nobiliares.
Pro garantire sa cura de sos fideles b’aiat bisòngiu de una crèsia noa. In s’universidade, in sa pratza omònima, b’aiat una capella intitulada a Santu Zusepe, chi aparteniat a s’antigu cullègiu de sos gesuitas, dae in ue sos padres fiant istados custrintos a si nch’andare fache a su 1870.
Sa cùria aiat detzìdidu duncas de trasferire su tìtulu a sa crèsia parrochiale noa, finas ca non b’aiat prus tèmpios catòlicos dedicados a su babbu putativu de Deus.
Aiant cumintzadu a la fraigare a partire dae su 1884 e l’aiant acabbada in bator annos. Sa prima missa l’aiat tzelebrada s’archipìscamu turritanu mussegnor Marongiu in su 1888.
Sa crèsia, chi giughet a intro una trona de màrmuru e un’òrganu a cannas, s’est mudada durante sos annos cun òperas de diferentes artistas. S’afresco de sa Natividade de s’àbside, pro nàrrere, est de s’artista umbra Gina Baldracchini, chi l’aiat pintadu in sos annos de sa segunda gherra mundiale e chi at traballadu finas in Casteddu in prus de una crèsia.
Sa parròchia de Santu Zusepe est bènnida a èssere e lu est galu oe su coro de su cuartieri nou, chi a bellu a bellu at pèrdidu sos àteros fràigos de riferimentu. In antis s’ispidale tzivile, como biblioteca universitària, a cosa sa presone de Santu Sebastianu, serrada in favore de sa presone noa de Bancali.
(luca foddai)
Leave a comment