Su ses de nadale Tàtari afestat su patronu suo, Santu Nigola, o Nicolau. Nàschidu in sa segunda metade de su de tres sèculos in Pàtara, Lìtzia, in sa penìsula anatòlica, si nche fiat tramudadu a Myra, in sa matessi regione, e in ie dd’aiant ordinadu presbìteru e a coa elègidu pìscamu. Semper in Myra dd’aiant interradu.
In su 1087, a pustis chi s’Àsia Minore in su giru de pagos annos fiat istada conchistada dae sos selgiùchides musulmanos, sos cristianos aiant detzìdidu de nche leare sos restos mortales de su santu a sa terra issoro. Una prima ispeditzione fiat partida dae Bari e dae issara sas relìchias s’agatant in sa tzitade pulliesa, chi at ligadu duncas su nùmene suo a su de su santu anatòlicu.
Carchi annu a pustis una segunda ispeditzione de venetzianos fiat arribada a Myra e si nch’aiat leadu àteros ossos, atribuidos semper a su santu, a sa tzitade lagunare.
Su cultu de Nigola s’est ispainadu in totu sa cristianidade, Sardigna incruida. In Tàtari est su patronu e dd’aiant intituladu sa crèsia, fraigada in s’Edade Mèdia a subra de unu tèmpiu paleocristianu, chi in su 1441 est bènnida a èssere catedrale turritana.
Protetore de marineris, mercantes e pipios, Nigola est connotu massimamente pro sa traditzione ligada a sos regalos in tempos de festa. Difatis pro sarvare sas fìgias de un’òmine chi, non podende·ddas cojuare, ca fiat tropu pòveru pro ddis garantire una dote, ddas cheriat destinare a èssere fèminas malas, nch’aiat ghetadu dinari a cua e a de note a domo issoro. Pròpiu in Tàtari est galu bia s’usàntzia de sa dote de Santu Nigola .
Semper dae sa matessi traditzione est nàschida sa costumàntzia de sas mìgias prenas de regalos pro sos pipios, chi in carchi logu est non sa die de sos Tres Res ma pròpiu sa dies natalis de su santu, su ses de nadale. In su mundu nòrdicu dae Santu Nicolau est bènnida sa figura de Santa Klaus, chi in sos Istados Unidos, figuradu comente un’òmine grassu, barbudu e bestidu de ruju, est su sìmbolu de sas festas de nadale.
(gianni muroni)
Leave a comment