S’Autoridade chi garantit sa cuncurrèntzia e su mercadu at abertu un’iscumbata a subra de sa manera chi pigant e falant sos prètzios de sos bolos aèreos in sos aereoportos sardos e sitzilianos. Difatis s’ischit chi sas cumpagnias aèreas impitant programmas e algoritmos pro lis seberare, ma non si cumprende comente e comente mai a sa fine andant a corfare sos biagiadores, ponende istorbos mannos a sa mobilidade de sos isolanos e de sos turistas chi cherent lòmpere a cussos giassos. Non bisòngiat, però, isperare tropu, ca cussos trastes informàticos sunt amparados dae sas leges a subra de su segretu industriale, e tando no at a èssere fatzile pro nudda a las barigare, nemmancu dae un’istitutzione de su guvernu.
Su problema generale divenit peus meda in s’Alighera chi, oe chi est oe, at pagos bolos, totu cantos pro s’Itàlia e nemmancu unu pro s’Europa. S’aeroportu de su nord-ovest est morende a lenu a lenu, sena chi sos polìticos de sos tretos de Tàtari renessent a si atopare e a si mòere aunidos. Su de Casteddu a s’imbesse est crèschidu meda. S’ismanniada est merèssida, ma sa menguada nono, ca at segadu servìtzios e economia chi fiant ponende raighinas fungudas.
Sa chistione no est noa, l’ischimus. Nde faeddat fintzas Antoni Cossu in su libru suo Mannigos de memoria de su 1984, cando sos disterrados sardos, pro cumbatare contra a sos trasportos ammigiados male, faghent una “rivolutzione” in s’ìsula. Su problema est chi pagos annos a como sa situatzione fiat mègius meda. Si cherimus de a beru peleare contra a sa fuida de sos sardos – giòvanos o betzos – sos trasportos sunt sa primu cosa. Si cherimus unu turismu fora de s’istiu sos trasportos sunt de importu mannu.
Gabriele Tanda
Leave a comment